پنجاب سمیت ملک کے مختلف علاقوں میں وقفے وقفے سے بارشوں کا سلسلہ جاری ہے۔

محکمہ موسمیات کے مطابق پنجاب کے مختلف شہروں میں مزید 04 روز تک تیز بارشیں متوقع ہیں جس کے باعث 36 اضلاع کے ڈسٹرکٹ ایمرجنسی آپریشن سینٹرز/ کنٹرول رومز کو 24 گھنٹے الرٹ رہنے کی ہدایت جاری کردی گئی ہے۔

اس حوالے سے پی ڈی ایم اے کا کہنا ہے کہ پنجاب میں بڑیے سیلاب کا خطرہ نہیں ہے تاہم گوجرانوالہ،سرگودھا اور ڈی جی خان ڈویژن میں تیز بارش کے باعث اربن فلڈنگ کا خطرہ ہے۔

اس کے علاوہ اٹک میں رات گئےشروع ہونےوالی بارش کا سلسلہ بغیرکسی وقفے کے جاری ہے تاہم موسلادھار بارش سے سڑکیں اور گلیاں زیرآب آگئیں ہیں۔

اسلام آباد میں بھی رات کے اندھیرے میں موسلا دھار بارش کا سلسلہ شروع ہوگیا تھا تاہم یہ سلسلہ آج وقفہ وقفہ سے جاری رہے گا۔

بارشوں کے باعث بعض مقامات پر تیز موسلادھار بارش کے باعث نشیبی علاقوں میں پانی آ سکتا ہے جبکہ تیز موسلادھار بارش کے باعث ندی نالوں میں طغیانی کا اندیشہ ہے۔

خیال رہے کہ ملک بھر میں مون سون بارشوں کے متعلق محکمہ موسمیات کا کہنا ہے کہ بھارت سے آنے والا ہوا کا کم دباؤ بحیرہ عرب میں شدت اختیار کر کے ڈیپریشن میں تبدیل ہوسکتا ہے تاہم سندھ، پنجاب اور بلوچستان میں بارشوں کے باعث نشیبی علاقوں میں سیلابی صورت حال کا خطرہ موجود ہے۔