جامعہ کراچی کی طرف نجی جامعہ کی ایم فل کی ڈگری تسلیم کرنے سے انکارکے بعد پریشان حال جوڑے نے عدالت سے رجوع کر لیا۔ 

تفصیلات کے مطابق نجی جامعہ کی ایم فل کی ڈگری تسلیم کرنے سے انکارپرپریشان حال جوڑے نے سندھ ہائی کورٹ سے درخواست دائر کردی۔

وکیل درخواست گزار عثمان فاروق ایڈووکیٹ نے مؤقف اختیار کیا کہ میاں بیوی نے 2018 میں ہمدرد یونیورسٹی سے ایم فل مکمل کیا۔ جامعہ کراچی میں ایچ ای سی سے حاصل کردہ مساواتی سرٹیفکیٹ بھی جمع کروایا۔

عثمان فاروق ایڈووکیٹ نے درخواست گزار کی طرف سے مؤقف اپنایا کہ  2022 میں کورس ورک امتحانات میں میاں بیوی سرفہرست تھے، قانون کے مطابق امتحانات کے بعد ریسرچ ٹاپک جمع کروایا گیا۔

وکیل درخواست گزار نے کہا کہ جامعہ کراچی کے ریسرچ بورڈ نے ٹاپک دینے سے منع کردیا۔ جامعہ کراچی نے نجی یونیورسٹی کا مساواتی سرٹیفکیٹ تسلیم کرنے سے انکار کردیا ہے۔

عدالت نے وفاق، ایچ ای سی اور جامعہ کراچی سے ستمبر تک جواب طلب کرلیا۔

موہاٹہ پیلس میں میڈیکل گرلز کالج کے قیام کا معاملہ

دوسری جانب موہاٹہ پیلس میں میڈیکل گرلز کالج کے قیام کے معاملے پرسندھ ہائی کورٹ میں موہاٹہ پیلس گیلری ٹرسٹ اور علاقہ مکینوں کی فریق بننے کی درخواستوں کی بھی سماعت سماعت ہوئی۔

عدالت نے ریمارکس دیے کہ محترمہ فاطمہ جناح نے موہاٹہ پیلس کو کالج بنانے کی وصیت کی تھی۔ جسٹس ذوالفقارعلی نے کہا کہ محترمہ فاطمہ جناح سے غلطی ہوگئی انہوں نے یہ سوچا۔ کل آپ کہیں گے انہوں نے پاکستان بنا کربھی غلطی کردی۔

جسٹس ذوالفقارعلی نے کہا کہ کیا محترمہ کی وصیت پرعمل نہیں ہونا چاہئے؟

وکیل علاقہ مکین نے مؤقف اپنایا کہ سپریم کورٹ کا فیصلہ ہے رہائشی پلاٹ پر کمرشل سرگرمیاں نہیں ہوسکتیں۔  محترمہ کی زیر استعمال اشیا اور قیمتی سامان کو برباد کردیا گیا۔

ایڈوکیٹ خواجہ شمس الاسلام نے کہا کہ پیپلزپارٹی حکومت نے غیرقانونی ٹرسٹ بنا کر موہاٹہ پیلس حوالے کردیا۔  مسلسل کمرشل سرگرمیوں پرعلاقہ مکینوں نے کوئی اعتراض نہیں کیا۔

خواجہ شمس الاسلام نے مؤقف اپنایا کہ میڈیکل کالج بنانے پرعلاقہ مکینوں کے اعتراض کا کوئی جوازنہیں۔

عدالت نے فریق بننے کی درخواستوں پر فیصلہ محفوظ کرلیا، سماعت تیس اگست تک ملتوی کردی گئی۔