خاتون جج کو دھمکی سے متعلق کیس میں عدالت نے اسپیشل پراسیکیوٹررضوان عباسی کے آنے تک سماعت میں وقفہ کر دیا۔ 

انسداد دہشت گردی عدالت اسلام آباد میں ایڈیشنل سیشن جج زیبا چوہدری کو دھمکی دینے سے متعلق کیس کی سماعت ہوئی۔

کیس کی سماعت انسداد دہشتگری عدالت کے جج راجہ جواد عباس حسن نے کی جبکہ عمران خان کے وکیل بابراعوان عدالت کے روبرو پیش ہوئے۔

ایڈووکیٹ بابراعوان نے دہشتگری کی دفعات ختم کرنے سے متعلق ہائی کورٹ کا فیصلہ پڑھ کرسنایا اور کہا کہ آڈرکے مطابق اب آپ کیس سیشن جج کو منتقل کریں گے۔

جج راجہ جواد عباس حسن نے وکیل بابر اعوان سے کہا کہ ہمارے پاس چلان جمع ہی نہیں کروایا گیا، آپ کو دوبارہ ضمانت کی درخواست دائرکرنی پڑے گی۔

عدالت نے ریمارکس دیے کہ نہ ہمارے پاس چالان جمع ہوا، نہ گواہ کا بیان ہوا نہ کچھ اور ہوا تو کیا منتقل کریں گے۔ ہمارے پاس اب تک ضمانت کا معاملہ تھا۔

جج راجہ جواد عباس حسن نے کہا کہ ہائی کورٹ کے آڈر کے بعد ہمارا دائرہ اختیار نہیں بنتا۔

وکیل عمران خان بابر اعوان نے عدالت سے کہا کہ 27 ستمبر کو دیگر ضمانتوں کی درخواست لگی ہیں، مزید جو آپ جو آڈر کریں۔

جج راجہ جواد عباس حسن نے کہا کہ ضمانت کی درخواست واپس کرلیں تو آپ کے لیے بہتر ہوگا۔

بابر اعوان نے جواب دیا کہ ہم ضمانت کی درخواست واپس نہیں لے رہے جس پرعدالت نے کہا کہ اسپیشل پراسیکیوٹر کہاں ہیں ان سے بھی رائے لے لیتے ہیں۔

انسدادِ دہشت گردی کی عدالت نے اسپیشل پراسیکیوٹررضوان عباسی کے آنے تک سماعت میں وقفہ کر دیا۔