سبحان علی ساحل کو گلشن بیت المکرم مسجد کے قریب سے گرفتار کیا گیا، پولیس نے سبحان علی ساحل کو نامعلوم مقام پر منتقل کردیا۔
پولیس نے تالا توڑ کر سبحان علی ساحل کو انہیں ایک گھر سے گرفتار کیا، پولیس کی جانب سے سبحان علی ساحل کی تفصیلات سے آگاہ نہیں کیا گیا۔
پی ٹی آئی رہنماء کی تلاش کیلئے فہیم خان ، ریاض حیدر ،سیف الرحمن مختلف تھانوں کے دورے کر رہے ہیں۔
سبحان علی ساحل کی گرفتاری ، پی ٹی آئی رہنماؤں کا سخت ردعمل سامنے آگیا
پی ٹی آئی رہنما سبحان علی ساحل کی گرفتاری پر پی ٹی آئی رہنماؤں کا سخت ردعمل سامنے آگیا ہے۔
حلیم عادل شیخ
قائد حزب اختلاف سندھ اسمبلی حلیم عادل شیخ نے سماجی رابطے کی ویب سائٹ ٹویٹر پر اپنے ایک پیغام میں پی ٹی آئی کے سینئر رہنماء سبحان علی ساحل کی گرفتاری پر مذمت کی ہے۔
کراچی میں پولیس نے پی ٹی آئی کے سینئر رہنماء سبحان علی ساحل کو گرفتار کرلیا ہے گھر کے تالے توڑ کر پولیس نے انہیں اغوا کرکے نامعلوم مقام منتقل کردیا ہے سندھ حکومت اور پولیس امپورٹڈ حکومت کی غلامی میں مصروف ہے pic.twitter.com/ZHgiBiRum5
— Haleem Adil Sheikh (@HaleemAdil) November 6, 2022
انہوں نے کہا کہ سبحان علی ساحل کی گرفتاری سندھ حکومت کے بوکھلاہٹ کی نشانی ہے، سندھ پولیس نے غلامی کے اور کتنے تمغے سجانے ہیں۔
حلیم عادل شیخ نے یہ بھی کہا کہ پی ٹی آئی رہنماؤں کارکنان کے خلاف حکومت گردی قابل مذمت ہے، عمران خان کے ساتھیوں ورکروں کو جھکانے ڈرانے والے ناکام ہونگے۔
قائد حزب اختلاف سندھ اسمبلی حلیم عادل شیخ نے مزید کہا کہ تماشے لگانے والے یاد رکھیں وقت ضرور بدلے گا، سبحان علی ساحل کو فوری رہا کیا جائے۔
بلال غفار
اپنے ایک بیان میں پی ٹی آئی کراچی کے صدر بلال غفار نے سبحان علی ساحل کی گرفتاری پر مذمت کرتے ہوئے کہا کہ سندھ حکومت اور وفاقی حکومت پی ٹی آئی کے ورکرز سے خوفزدہ ہے
بلال غفار نے کہا کہ سبحان علی ساحل کو گرفتار نہیں بلکہ اغواء کیا گیا ہے، سبحان علی ساحل کا کیا جرم ہے بتایا جائے۔
پی ٹی آئی کراچی کے صدر بلال غفار نے مزید کہا کہ سندھ حکومت کی پولیس نے غلامی کے تمام ریکارڈ توڑ دیئے ہیں، لگتا ہے سندھ حکومت نے جیلیں بےگناہوں سے بھرنے کی ٹھان لی ہے، سبحان علی ساحل کی فوری رہائی کا مطالبہ کرتے ہیں۔
خرم شیر زمان
پی ٹی آئی پارلیمانی لیڈر سندھ اسمبلی خرم شیر زمان نے بھی اپنے ایک بیان میں سبحان علی ساحل کی گرفتاری پر مذمت کی ہے۔
خرم شیر زمان نے کہا کہ سندھ پولیس کی جانب سے سبحان علی ساحل کی گرفتاری کی مذمت کرتا ہوں، سبحان علی ساحل عمران خان کے ساتھ کھڑے رہنے کی قیمت ادا کررہے ہیں۔
انہوں نے یہ بھی کہا کہ پی ٹی آئی کا کوئی ورکر رہنماء ان غیر آئینی گرفتاریوں سے گھبرانے والا نہیں، پولیس جرائم ختم کرنے میں پیچھے انتقامی کارروائیوں میں سب سے آگے ہے۔
پی ٹی آئی پارلیمانی لیڈر سندھ اسمبلی خرم شیر زمان نے مزید کہا کہ سندھ حکومت نے پولیس کا سیاسی استعمال کرکے محکمے کی عزت داؤ پر لگادی ہے، آئی جی سندھ غلامی کے بجائے اپنا فرض ادا کریں، سبحان علی ساحل کو فوری رہا نہ کیا گیا تو شدید ردعمل دیں گے
ارسلان تاج
پی ٹی آئی سندھ کے ترجمان و رکن صوبائی اسمبلی ارسلان تاج نے بھی پارٹی کے سینئر رہنما و کراچی کے سابق صدر سبحان علی ساحل کی گرفتاری پر مذمت کرتے ہوئے کہا کہ سبحان علی ساحل کی غیر قانونی گرفتاری کی شدید مذمت کرتے ہیں۔
ارسلان تاج نے کہا کہ سبحان علی ساحل کی گرفتاری سے سندھ حکومت کی بوکھلاہٹ کا اندازہ لگایا جا سکتا ہے، ہم ہر طرح کے حالات کا سامنا کرنے کے لیے تیار ہیں۔
ان کا کہنا تھا کہ آخر انہیں پر امن کارکنان اور رہنماؤں سے کس بات کا خوف ہے؟ پی ٹی آئی کا ہر شخص عمران خان ہے، یہ کتنوں کو گرفتار کریں گے، ہمارا احتجاج مطالبات کی منظوری تک جاری رہے گا۔
رکن صوبائی اسمبلی ارسلان تاج کا مزید کہنا تھا کہ ہم سبحان علی ساحل کی فوری رہائی کا مطالبہ کرتے ہیں، اس قسم کی ماورائے قانون گرفتاریاں کسی صورت قابل قبول نہیں۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News