صدر مملکت نے کہا ہے کہ پاکستان اور سربیا کے درمیان مختلف شعبوں میں تعاون کے کثیر مواقع موجود ہیں۔

تفصیلات کے مطابق صدر مملکت ڈاکٹر عارف علوی نے سربیا میں پاکستان کے نامزد سفیر علی حیدر الطاف سے ایوانِ صدر میں ملاقات کی۔

صدر مملکت نے کہا کہ پاکستان اور سربیا کے مابین تجارتی اور اقتصادی تعاون کے امکانات سے مکمل طور پر فائدہ حاصل کیا جانا چاہیے، دونوں ممالک کے درمیان تجارتی سرگرمیوں کو فروغ دینے کی ضرورت ہے۔

ڈاکٹر عارف علوی نے کہا کہ نامزد سفیر کاروباری وتجارتی روابط قائم کرنے اور دونوں ممالک کے چیمبرز آف کامرس کے درمیان تعاون بڑھانے کی کوشش کریں۔

انہوں نے یہ بھی کہا کہ پاکستان کے سفیر دونوں ممالک کے درمیان دوطرفہ دوروں کی تعداد بڑھانے کے لئے کام کریں جبکہ اعلیٰ وتکنیکی تعلیم، آئی ٹی اور ثقافت سمیت مختلف شعبوں میں تعاون کی نئی راہیں تلاش کرنی چاہئے۔

صدر مملکت ڈاکٹر عارف علوی نے مزید کہا کہ پاکستان میں سرمایہ کاری کے لیے سازگار ماحول ہے ، پاکستان اور سربیا کے درمیان صنعت و تجارت، قابل تجدید توانائی سمیت مختلف شعبوں میں تعاون کے کثیر مواقع موجود ہیں۔