احتساب عدالت نے 3 ارب 20 کروڑ روپے کے جعلی پینشن اسکینڈل کیس میں ریفرنس حیدرآباد منتقل کرنے کی درخواست مسترد کردی۔ 

تفصیلات کے مطابق احتساب عدالت کراچی میں 3 ارب 20 کروڑ روپے کے جعلی  پینشن اسکینڈل کیس میں سابق ڈپٹی سیکریٹری فنانس عامرضیا اسران سمیت 84 ملزمان کے خلاف ریفرنس کی سماعت ہوئی۔

ریفرنس میں گرفتار ملزم عامر ضیاء اسران سمیت دیگرعدالت کے سامنے پیش ہوئے۔

احتساب عدالت نے ملزم اشرف جانوری کی نیب قوانین میں نئی ترمیم کے بعد ریفرنس حیدرآباد منتقل کرنے سے متعلق درخواست پر فیصلہ سناتے ہوئے ریفرنس حیدرآباد منتقل کرنے سے متعلق درخواست مسترد کردی۔

احتساب عدالت نے ریفرنس کی مزید سماعت 25 نومبر تک ملتوی کردی۔

ملزم ریاض کی جانب ریفرنس کے دائرہ اختیار سے متعلق درخواست دائر کی گئی تھی جس میں مؤقف اختیار کیا گیا تھا کہ نیب قوانین میں نئی ترمیم کے بعد ریفرنس کی سماعت حیدرآباد میں ہونی ہے۔

نیب کے مطابق ملزم عامرضیا اسران تب پلاننگ اینڈ ڈویلپمنٹ تعینات تھے۔ نیب نے ملزم عامر اسران کو امریکا سے واپسی پر جناح انٹرنیشنل ایئرپورٹ سے گرفتار کیا تھا۔

نیب کا کہنا تھا کہ ملزم پر جعلی پیشن اسکینڈل میں ملوث ہونے کا الزام ہے۔ ملزم عامر اسران و دیگر پر قومی خزانے کو 3 ارب اور 20 کروڑ روپے نقصان پہنچانے کا الزام ہے۔