قطر میں ہونے والے فیفا ورلڈ کپ 2022 سے قبل ہی عالمی فٹ بال کے اہم فارورڈ زخمی ہو گئے ہیں۔

تفصیلات کے مطابق ارجنٹائن کے کپتان اور فارورڈ لیونل میسی اپنے کلب سینٹ جرمین کی جانب سے لورینٹ کے خلاف میچ میں زخمی ہو گئے تھے۔

اس میچ میں سینٹ جرمین کو ایک کے مقابلے میں دو گول سے شکست کا سامنا کرنا پڑا تھا۔

لیونل میسی کے کلب کے ڈاکٹرز نے آرام کا مشورہ دیا ہے، دوسری جانب پی ایس جی کلب نے اپنی ویب سائٹ پر ایک بیان میں کہا ہے کہ امید ہے میسی اگلے ہفتے دوبارہ ٹریننگ شروع کر دیں گے۔

لیونل میسی کے زخمی ہونے کی خبر آنے کے بعد فٹ بال کے شائقین میں بے چینی پھیل گئی ہے، شائقین کا کہنا ہے کہ میسی کے بنا ورلڈ کپ ادھورا ہے۔

پی ایس جی کے مینجر کرسٹوٖ گالٹیر نے ایک پریس کانفرنس میں کہا کہ وہ توقع کرتے ہیں کہ میسی 13 نومبر کو آکسیری کے خلاف لیگ کے میچ میں حصہ لیں گے جو ورلڈ کپ سے قبل آخری میچ ہو گا۔

لیونل میسی کی انجری نے ارجنٹائن میں خطرے کی گھنٹی بجا دی ہے، کیونکہ اس سے قبل ارجنٹائن کے اینجل ڈی ماریا اور پاؤلو ڈیبالا بھی زخمیوں کی فہرست میں موجود ہیں۔

لیونل میسی نے خود ایک اسپورٹس چینل کو انٹرویو دیتے ہوئے کہ انہیں اپنی انجری پر پریشانی لاحق ہے۔

میسی نے اسپورٹس چینل پر گفتگو کرتے ہوئے کہا کہ یہ ورلڈ کپ ماضی کے ورلڈ کپ سے مختلف ہے کیونکہ یہ سال کے آخری مہینے میں کھیلا جا رہا ہے۔

لیونل میسی نے اپنی انجری کے حوالے سے کہا کہ میری انجری نے مجھے عین ورلڈ کپ کے قریب خوف زدہ کر دیا ہے، میں ذاتی طور پر اس صورتحال سے خوفزدہ ہوں۔

ارجنٹائن ورلڈ کپ میں اپنی مہم کا آغاز 22 نومبر کو سعودی عرب کے خلاف کرے گا۔

قطر 2022 لیونل میسی کا ورلڈ کپ جیتنے کا پانچواں اور آخری موقع ہوگا، گزشتہ سال کی کوپا امریکہ کی جیت ارجنٹائن کے بطور کپتان ان کی پہلی ٹرافی تھی

ارجنٹائن کی عوام نے 1986 کے بعد ارجنٹائن کا پہلا ورلڈ کپ جیتنے کے لیے لیونل میسی سے کافی توقعات وابستہ کر رکھی ہیں۔

واضح رہے کہ میسی رواں سیزن میں اپنی بہترین کارکردگی حریف ٹیموں کے لیے خطرے کی گھنٹی بجا دی ہے، انہوں نے تمام مقابلوں میں 12 گول اور 14 معاونت کی ہے۔

یاد رہے گزشتہ ہفتے، جرمنی کے ٹیمو ورنر اور انگلینڈ کے بین چلویل انجری کے باعث ورلڈ کپ سے باہر ہونے والے کھلاڑیوں کی بڑھتی ہوئی فہرست میں تازہ ترین اضافہ تھے۔