انگلش آل راؤنڈر معین علی نے اپنے ایک بیان میں عالمی کرکٹ کے موجودہ شیڈول کو سخت تنقید کا نشانہ بنایا۔

تفصیلات کے مطابق ٹی ٹوئنٹی ورلڈ کپ ٹرافی اٹھانے کے ایک ہفتہ بعد ہی، انگلینڈ کی محدود اوورز کی ٹیم 17 نومبر آسٹریلیا کے خلاف تین میچوں کی سیریز کھیلے گی۔

انگلش آل راؤنڈر نے ایک کرکٹ کے معروف جریدے کو انٹرویو میں کہا کہ موجودہ حالات میں اب ان کے پاس اتنا وقت بھی نہیں ہے کہ وہ عالمی چمپئین بننے کی خوشیاں منا سکیں۔

معین علی نے کہا کہ عالمی ورلڈ کپ کے فائنل کے صرف تین دن بعد ہی میچ کھیلنا خوفناک ہے۔

معین علی کے مطابق بطور کھلاڑی ہم اب اس کے عادی ہو گئے ہیں، لیکن جب آپ ہر دو، تین دن میں کھیل رہے ہوں تو ہر وقت سو فیصد دینا مشکل ہوتا ہے۔”

آل راؤنڈر کا کہنا تھا کہ کرکٹ کا شیڈول اب پہلے سے زیادہ ہو گیا ہے کیونکہ جب ہم نے 2019 میں ورلڈ کپ جیتا تھا، تو ہمارے پاس دو ہفتے بعد ایشز کا میچ تھا اور تقریباً دس دن بعد ہمارا آئرلینڈ کے خلاف ٹیسٹ میچ تھا۔

معین علی نے شیڈول پر اعتراض کرتے ہوئے کہا کہ اس قسم کی چیزیں شرمناک ہیں، ایک گروپ کے طور پر ہم لطف اندوز ہونا اور عالمی کپ کا جشن منانا چاہتے ہیں۔

دوسری جانب آسٹریلیا کے سابق کپتان مائیکل کلارک نے معین علی کے کرکٹ کے شیڈول پر تنقید کا ردعمل دیتے ہوئے کہا کہ اگر آپ ورلڈ کپ میں کھیل رہے ہوں اور پھر اگلے دن آئی پی ایل کھیلنے کے لئے ہوائی جہاز میں روانہ ہوں تو مجھے نہیں لگتا کہ آپ کو کسی کی چیخیں سنائی دیں گی۔

مائیکل کلارک نے کہا کہ کھلاڑی بین الاقوامی شیڈول کے بارے میں شکایت نہیں کر سکتے، کیونکہ جب آپ ڈومیسٹک کرکٹ اور پیسوں کی خاطر فرنچائزز کے لیے چھ یا آٹھ ہفتوں کی چھٹیاں لے سکتے ہو تو اس وقت آپ گل داؤدی کی طرح تازہ دم کیوں ہو جاتے ہو۔