چیئرمین سینیٹ نے کہا ہے کہ پاکستان اور کینیڈا کے درمیان دیرینہ دوستانہ اور خوشگوار تعلقات ہیں۔

تفصیلات کے مطابق چیئرمین سینیٹ محمد صادق سنجرانی سے پاکستان ویسٹرن کینیڈا ٹریڈ ایسوسی ایشن اوریو ایس پاکستان انٹرنیشنل چیمبر آف کامرس کے وفد کی پارلیمنٹ ہاؤس میں ملاقات ہوئی جس میں باہمی دلچسپی کے امور پر تفصیلی تبادلہ خیال کیا گیا۔

ملاقات میں پاکستان اور کینیڈا کے دوطرفہ تعلقات کو مزید تقویت دینے کے لیے تعمیری اور بامعنی کوششیں کرنے کے عزم کا اعادہ کیا گیا۔

اس موقع پر چیئرمین سینیٹ محمد صادق سنجرانی نے کہا کہ پاکستان اور کینیڈا کے درمیان دیرینہ دوستانہ اور خوشگوار تعلقات ہیں، کینیڈا کے ساتھ وسیع تر اور کثیر الجہتی شراکت داری کو فروغ دینے کے لیے پرعزم ہیں۔

صادق سنجرانی نے یہ بھی کہا کہ دونوں ممالک کے درمیان تعلقات میں تجارت اور سرمایہ کاری پر خصوصی توجہ دینی ہوگی۔

ان کا کہنا تھا کہ پاکستانی مصنوعات کو کینیڈین مارکیٹ میں متعارف کرنے کی ضرورت ہے اور کینیڈین کمپنیوں کو پاکستان میں سرمایہ کاری اور ایک بڑی صارف مارکیٹ سے فائدہ حاصل کرنا چاہیے۔

چیئرمین سینیٹ محمد صادق سنجرانی کا مزید کہنا تھا کہ دونوں ممالک کے درمیان عوامی سطح پر نقل و حرکت کو آسان بنانے کی ضرورت ہے۔

ملاقات میں سینیٹر ذیشان خانزادہ، سیکریٹری سینیٹ قاسم صمد خان بھی پر موجود تھے۔