ذرائع کا کہنا ہے کہ راولپنڈی میں حقیقی آزادی مارچ کے لیے عمران خان کل روانہ ہوں گے۔ 

تفصیلات کے مطابق پاکستان تحریک انصاف کی 26 نومبرکو راولپنڈی کال سے متعلق تحریک انصاف کل راولپنڈی میں اپنی سیاسی طاقت کا مظاہرہ کرے گی۔

پارٹی ذرائع کا کہنا ہے پی ٹی آئی نے چیئرمین پی ٹی آئی عمران خان کی لاہور سے راولپنڈی روانگی کی تیاریوں کو حتمی شکل دے دی ہے۔ تحریک انصاف کے چیئرمین عمران خان کل دوپہر 1 اور 2 بجے کے درمیان زمان پارک سے روانہ ہوں گے۔

پارٹی ذرائع کے مطابق عمران خان زمان پارک سے سخت سیکیورٹی کے حصار میں لاہورائرپورٹ پہنچیں گے۔ پی ٹی آئی کے چئیرمن آئر پورٹ سے بذریعہ ہیلی کاپٹرراولپنڈی روانہ ہوں گے۔

تحریکِ انصاف کے چیئرمین عمران خان راولپنڈی میں حقیقی آزادی مارچ کی قیادت کریں گے۔ عمران خان کے ہمراہ ہیلی میں ڈاکٹرز بھی موجود ہوں گے۔

پارٹی ذرائع کا کہنا ہے کہ راولپنڈی میں دھرنا ہوگا یا جلسہ ؟ اس کا اعلان عمران خان کریں گے۔ عمران خان کل راولپنڈی میں حقیقی آزادی مارچ کے شرکاء کو اپنے آئندہ کے لائحہ عمل سے بھی آگاہ کریں گے۔

اسٹیج کو تیاری کے مراحل میں مشکلات

ادھرحقیقی آزادی مارچ کے آخری مراحل میں داخل ہوچکی تاہم مری روڈ فیض آباد سے چند قدم کے فاصلے پر تیارکیے جانے والے اسٹیج کی تیاری کے مراحل میں مشکلات درپیش ہیں۔

عمران خان کے اسٹیج پر جاری کام کو دو سے تین بار روکا گیا۔ اب حقیقی آزادی مارچ کے لیے عمران خان کے اسٹیج کو راولپنڈی مری روڑ رحمان آباد کے مقام پر اجازت دی گئی۔

کینٹینرکی تیاری

دوسری جانب لانگ مارچ کے سلسلے میں عمران خان کے کینٹینرکی تیاری جاری ہے۔ تاریخ میں پہلی بار کینٹینر پر ریمپ اور لفٹ کا انتظام کیا گیا۔

عمران خان براستہ وہیل چئیر یا گاڑی کینٹر پر پہنچیں گے۔ ریمپ کے علاوہ عمران خان لفٹ کا استعمال بھی کرسکتے ہیں۔

لانگ مارچ میں مرکزی کینٹینر پر دو عدد بڑی ایل سی ڈیز نصب ہونگی۔ شرکا کے کلیئر ویو کیلئے کئی کلو میٹر تک اسکرینز نصب ہوں گی۔