ماحولیاتی تبدیلی کے رضاکاروں نے برطانیہ کی مصروف ترین شاہراہ ایم 25 کو بلاک کر دیا جس سے گاڑیوں کی طویل قطاریں لگ گئیں۔

تفصیلات کے مطابق ’جسٹ اسٹاپ آئل‘ تنظیم کے مظاہرین نے مسلسل دوسرے دن برطانیہ کی مصروف ترین موٹر وے کے کچھ حصوں کو بلاک کر دیا ہے، جس سے رش کے اوقات میں ٹریفک معطل ہو گیا۔

جسٹ اسٹاپ آئل تنظیم کے رضاکار موسمیاتی تبدیلی سے نمٹنے کے لیے مزید حکومتی کارروائی کا مطالبہ کر رہے ہیں۔

غیر ملکی میڈیا رپورٹس کے مطابق تنظیم کے 15 رضاکاروں نے آج صبح ایم 25 شاہراہ کے اوور ہیڈ پر بیٹھ گئے تھے۔

واضح رہے کہ ایم 25 برطانیہ کی مرکزی شاہراہ ہے جو لندن کے مختلف حصوں کو آپس میں ملاتی ہے۔

پولیس کا کہنا ہے کہ شاہراہ کے مختلف حصوں پر تنظیم کے رضاکاروں نے ایک ساتھ مظاہرہ شروع کیا جس کی وجہ سے ٹریفک کی روانی معطل ہو گئی اور گاڑیوں کی طویل قطاریں لگ گئی۔

ایسیکس پولیس کے مطابق مظاہرین نے ڈارٹ فورڈ کراسنگ کی طرف جانے والے کیریج وے کو بلاک کیا جس کی وجہ سے ڈارٹ فورڈ ٹنل کو بند کرنا پڑا۔

ہرٹ فورڈ شائر کی پولیس کا کہنا ہے کہ وہ کنگز لینگلے کے قریب جنکشن پر ہونے والے احتجاج کی نگرانی کر رہی تھی اور گاڑی چلانے والوں سے متبادل راستہ اختیار کرنے کا کہا جا رہا تھا۔

سرے پولیس نے کہا کہ دو مظاہرین جنکشن 8 اور 9 اور جنکشن 12 اور 13 کے درمیان موٹر وے کی گینٹری پر بھی چڑھ گئے تھے، جس سے موٹر وے کے اس حصے پر دونوں سمتوں کی ٹریفک روک دی گئی۔

یہ فوری طور پر واضح نہیں ہو سکا یہ خلل کب تک جاری رہے گا، برطانوی میڈیا کی رپورٹس کے مطابق ایم 25 میں داخل ہونے والی اہم سروس سڑکوں پر بھی ٹریفک جام ہے اور گاڑیوں کی لمبی قطاریں لگ گئی ہیں۔