چین کے شہر ژینگ زو میں سب سے بڑی آئی فون فیکٹری میں ملازمین کے احتجاج نے دنیا بھر کو اپنی طرف متوجہ کر لیا ہے۔

تفصیلات کے مطابق سوشل میڈیا پر وسیع پیمانے پر گردش کرنے والی فوٹیج کے مطابق چین کے شہر ژینگ زو میں دنیا کی سب سے بڑی آئی فون فیکٹری میں مظاہرے پھوٹ پڑے ہیں۔

ویڈیو میں آئی فون فیکٹری کے سینکڑوں کارکنوں کو مارچ کرتے ہوئے دکھایا گیا ہے، جن میں سے کچھ کا سامنا پولیس والے لوگوں سے ہوا۔

احتجاج کو لائیو سٹریم کرنے والوں نے بتایا کہ کارکنوں کو پولیس نے مارا پیٹا بھی ہے جبکہ کچھ ویڈیوز میں جھڑپیں بھی دکھائی دیتی ہیں۔

مینوفیکچرر کمپنی کے ترجمان نے کہا کہ وہ مزید تشدد کو روکنے کے لیے عملے اور مقامی حکومت کے ساتھ مل کر کام کرے گا۔

اپنے بیان میں فرم نے کہا کہ کچھ کارکنوں کو تنخواہ کے بارے میں شک تھا لیکن یہ فرم معاہدوں کی بنیاد پر تنخواہ پوری کرے گی۔

آئی فون کمپنی کے ترجمان نے ان افواہوں کی سختی سے تردید کی کہ نئی بھرتی کرنے والوں کو ان کارکنوں کے ساتھ ہاسٹلریز بانٹنے کے لیے کہا جا رہا ہے جو کوویڈ پازیٹو تھے۔

کمپنی کا مزید کہنا تھا کہ نئے لوگوں کے آنے سے پہلے مقامی حکام نے ہاسٹلریز کو جراثیم سے پاک کیا اور چیک کیا۔

واضح رہے کہ پچھلے مہینے، بڑھتے ہوئے کووِڈ کیسز کے باعث آئی فون فیکٹری کو لاک ڈاؤن کا سامنا کرنا پڑا تھا، اور کچھ کارکنوں کو گھر جانے کا کہا گیا تھا۔

برطانوی میڈیا کی رپورٹ کے مطابق فیکٹری نے لاک ڈاؤن کے دوران فراخدلانہ بونس کے وعدے کے ساتھ نئے کارکنوں کو بھرتی کیا۔

فیکٹری کے ملازمین کا کہنا تھا کہ کمپنی نے ان کے ساتھ دھوکہ کیا ہے، لاک ڈاؤن کے بہانے ہمیں گھر بھیج کر نئی بھرتیاں کر لی جو ہمارے حقوق پر ڈاکہ ہے جسے ہم کسی صورت برداشت نہیں کریں گے۔

ملازمین کا کہنا تھا کہ فیکٹری انتظامیہ نے معاہدہ تبدیل کیا تاکہ ہمیں سبسڈی نہ مل سکے جیسا کہ انہوں نے وعدہ کیا تھا۔

انہوں نے کہا کہ بدھ کی صبح پلانٹ پر پولیس کی بھاری نفری تعینات تھی جبکہ دیگر لائیو سٹریم ویڈیوز میں بھی اس جگہ پر مسلح پولیس کے ہجوم کو دکھایا گیا ہے۔