وزیراعلیٰ بلوچستان نے کہا ہے کہ بلوچستان کے عوام متحدہ عرب امارات کے تعاون کو قدر کی نگاہ سے دیکھتے ہیں۔

تفصیلات کے مطابق وزیراعلیٰ بلوچستان میر عبدالقدوس بزنجو سے متحدہ عرب امارات کے سفیر حماد عبید ابراہیم الزابی کی ملاقات ہوئی جس میں بلوچستان میں سرمایہ کاری اور یو اے ای کے اشتراک سے جاری فلاحی منصوبوں پر بات چیت کی گئی۔

ملاقات کے دوران یو اے ای اور حکومت بلوچستان کے باہمی تعلقات کے فروغ سمیت باہمی دلچسپی کے دیگر امور پر بھی تبادلہ خیال کیا گیا۔

ملاقات میں وزیراعلیٰ بلوچستان نےکوئٹہ میں شیخ محمد بن زید النہیان امراض قلب مرکز کے قیام پر متحدہ عرب امارات کی حکومت سے تشکر کا اظہار کیا۔

میر عبدالقدوس بزنجو کی جانب سے یو اے ای کے سفیر کو بلوچستان کے مختلف شعبوں میں سرمایہ کاری کے مواقعوں کے حوالے سے بھی آگاہ کیا گیا۔

وزیراعلیٰ بلوچستان نے کہا کہ صوبے کے سیلاب متاثرین کے لئے امداد کی فراہمی پر بھی یو اے ای کی حکومت کے شکر گزار ہیں۔

میر عبدالقدوس بزنجو کا کہنا تھا کہ بیرونی سرمایہ کاری کے فروغ کے لئے صوبائی حکومت نے جامع پالیسی بنائی ہے، بلوچستان کے عوام متحدہ عرب امارات کے تعاون کو قدر کی نگاہ سے دیکھتے ہیں۔

وزیراعلیٰ بلوچستان میر عبدالقدوس بزنجو

وزیراعلیٰ بلوچستان میر عبدالقدوس بزنجو کا مزید کہنا تھا کہ یو اے ای کے سرمایہ کار بلوچستان میں محفوظ اور منفعت بخش سرمایہ کاری کر سکتے ہیں، ریکو ڈک منصوبہ بلوچستان میں سرمایہ کاری کا گیٹ وے ثابت ہو گا۔

ملاقات میں یو اے ای کے سفیر نے بلوچستان میں سرمایہ کاری کے مواقعوں میں گہری دلچسپی کا اظہار کیا۔

متحدہ عرب امارات کے سفیر حماد عبید ابراہیم الزابی نے کہا کہ یو اے ای کے سرمایہ کاروں کو بلوچستان میں سرمایہ کاری کی جانب راغب کیا جائے گا، کارڈک سینٹر یو اے ای کے عوام اور حکومت کی جانب سے بلوچستان کے عوام کے لیۓ تحفہ ہے۔