بھارت میں پاکستان زندہ باد کے نعرے لگانے پر کالج انتظامیہ نے 3 طلبہ کو فارغ کردیا۔ 

بھارتی میڈیا رپورٹس کے مطابق بھارت کے شہر بنگلورو کے نیوہورائزن کالج آف انجینیئرنگ میں 26 سے 26 نومبر کے درمیان ایک فیسٹیول کی تیاریاں ہورہی تھیں، اس دوران پاکستان زندہ باد کے نعرے لگ گئے۔

بعد ازاں نیو ہورائزن کالج آف انجینیئرنگ  کے طلبہ کی جانب سے پاکستان زندہ باد کے نعرے لگانے کی ویڈیو سوشل میڈیا پر وائرل ہوگئی جس پر بھارتی پولیس نے ایکشن لیتے ہوئے تینوں طالب علموں کو حراست میں لے لیا۔

تفصیلات کے مطابق ایک ایونٹ کی تیاریوں کے دوران چند طلبہ کی جانب سے انڈین پریمیئر لیگ (آئی پی ایل) کی پسندیدہ ٹیموں اور ان میں شامل غیر ملکی کھلاڑیوں کے ممالک کے نام کے نعرے لگانا شروع کردیے۔

اس دوران تین طلبہ نے پاکستان زندہ باد کے نعرے لگائے تو پاس کھڑے ایک اور طالب علم نے ان کی ویڈیو ریکارڈ کرلی۔ پاکستان زندہ باد کے نعرے لگانے والے تینوں طلبہ ایان، دیناکار اور ریا کی عمریں 17 سے 18 سال کے درمیان ہیں۔

پولیس کے مطابق تینوں طلبہ نے پاکستان زندہ باد کے نعرے جذبات میں صرف اور صرف تفریح کے مقصد سے لگائے تھے اور تفتیش کے درمیان انہوں نے پولیس کے ساتھ مکمل تعاون کیا۔

بعد ازاں کالج انتظامیہ نے تینوں طالب علموں کو کالج سے فارغ کیا تاہم پولیس نے تفتیش کے بعد تینوں طالب علموں کو ضمانت پر رہا کردیا۔