مریم اورنگزیب نے کہا ہے کہ انڈسٹری کا فروغ ہماری اولین ترجیحات میں شامل ہے۔

تفصیلات کے مطابق وفاقی وزیر اطلاعات و نشریات مریم اورنگزیب نے ایک تقریب سے خطاب کرتے ہوئے کہا کہ دنیا بھر میں اسکرین ٹورازم اہم مقام حاصل کر چکی ہے۔

انہوں نے کہا کہ اسکرین ٹورازم کے ذریعے ہم نہ صرف اپنی کہانی بیان کر سکتے ہیں بلکہ اپنی ثقافت اور معاشرتی اقدار کو بھی فروغ دے سکتے ہیں۔

مریم اورنگزیب نے کہا کہ بدقسمتی سے پاکستان کی فلم انڈسٹری نے بہت کٹھن حالات کا سامنا کیا، 60ء کی دہائی میں پاکستان جنوبی ایشیاء میں فلم سازی کے لحاظ ایک بڑا ملک ہونے کے ساتھ ساتھ اپنے ہمسایہ ملک کے مقابلے میں فلمی صنعت کا سب سے بڑا پروڈیوسر ملک تھا۔

وفاقی وزیر اطلاعات و نشریات نے یہ بھی کہا کہ پاکستان میں تیس سے چالیس سالوں میں فلم انڈسٹری تقریباً ختم ہو چکی تھی، گزشتہ دس سالوں میں فلم انڈسٹری دوبارہ بحالی کی جانب گامزن ہوئی۔

ان کا کہنا تھا کہ مسلم لیگ (ن) نے اپنے پچھلے دور حکومت میں 2018ء میں پاکستان کی 70 ویں سالگرہ کے موقع پر فلم اینڈ کلچر پالیسی کا اجراء کیا۔

مریم اورنگزیب نے کہا کہ یہ پالیسی پاکستان کی ستر سالہ تاریخ میں پہلی مرتبہ تیار کی گئی تھی، یہ ہمارا ایک نامکمل ٹاسک تھا جو ہم نے اپریل 2022ء میں دوبارہ شروع کیا۔

انہوں نے یہ بھی کہا کہ فلم انڈسٹری میں روزگار کے کم مواقع کے باعث پاکستان میں طلباء عموماً اس ڈگری کی طرف کم آتے ہیں، انڈسٹری کا فروغ ہماری اولین ترجیحات میں شامل ہے۔

ان کا کہنا تھا کہ فلم انڈسٹری کے فروغ کے لئے حکومت پاکستان نے فلم انڈسٹری پر ٹیکس زیرو کر دیا ہے، پاکستان میں فلم سازی سے ہونے والی آمدن پر اب کوئی ٹیکس نہیں ہے۔

وفاقی وزیر اطلاعات و نشریات مریم اورنگزیب کا مزید کہنا تھا کہ پاکستان کے نوجوانوں کو فلم سازی میں تربیت فراہم کرنے کی ضرورت ہے، فاطمہ جناح یونیورسٹی کی جانب سے نقش ڈیجیٹل فلم جیسے اقدامات سے پاکستان میں فلمی صنعت کو فروغ ملے گا۔