وزیراعظم نے کہا ہے کہ موسمیاتی تبدیلی کے باعث بارشوں سے پاکستان میں بے پناہ تباہی ہوئی۔
تفصیلات کے مطابق شرم الشیخ میں ہونے والی کوپ 27 سمٹ سے متعلق وزیراعظم ہائوس میں منعقدہ تقریب سے خطاب میں وزیراعظم شہباز شریف نے کہا کہ پاکستان نے شرم الشیخ کانفرنس میں آفات سے ہونے والے ضیاع اور نقصان کے ایجنڈا کو موثر طریقے سے اجاگر کیا جس کے نتیجے میں لاس اینڈ ڈیمیج فنڈ کا قیام عمل میں آیا۔
وزیراعظم نے کہا کہ پاکستان کو حالیہ سیلاب سے بہت نقصانات ہوئے ہیں، 3کروڑ 30 لاکھ افراد متاثر ہوئے، 1800 اموات ہوئیں جبکہ زراعت ،صنعت ، لائیو اسٹاک، انفراسٹرکچر سمیت 30 ارب ڈالر کے نقصانات کا تخمینہ لگایا گیا ہے۔
شہباز شریف نے کہا کہ پاکستان کے سیلاب متاثرین کی مدد کرنے والے تمام ممالک کا شکریہ ادا کرتے ہیں،مشکل کی اس گھڑی میں کی جانے والی مدد ہمیشہ یاد رکھی جائے گی۔
ان کا کہنا تھا کہ موسمیاتی تبدیلی کے باعث بارشوں سے پاکستان میں بے پناہ تباہی ہوئی حالانکہ موسمیاتی تبدیلیوں کا سبب بننے والی گیسوں کے اخراج میں پاکستان کا حصہ ایک فیصد سے بھی کم ہے۔
شہباز شریف کا یہ بھی کہنا تھا کہ ہماری خواہش اور دعا ہے کہ جو پاکستان میں ہوا وہ کسی دوسرے ملک کے ساتھ نہ ہو تاہم یہ تلخ حقیقت ہے کہ موسمیاتی تبدیلیوں کے اثرات اور ان کے نتیجے میں رونما ہونے والی آفات سرحدوں کی پابند نہیں۔
شہباز شریف نے کہا کہ یہ پہلی مرتبہ ہوا کہ پاکستان کی آواز عالمی سطح پر سنی گئی۔
وزیراعظم شہباز شریف نے مزید کہا کہ پاکستان کا مقدمہ موسمیاتی انصاف ہے خیرات نہیں، ترقی یافتہ ممالک کی جانب سے ماحولیاتی تبدیلیوں کے چیلنج کو قبول کرنا خوش آئند ہے لیکن وعدوں پر عمل بھی ضرور کرنا ہوگا۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News