امریکہ میں آنے والے برفانی طوفان کے باعث سیاحوں کی دلچسپی کا مرکز نیاگرا آبشار کو بھی اپنی لپیٹ میں لے لیا۔

تفصیلات کے مطابق شدید برفانی موسم نے امریکہ کے کچھ حصوں کو اپنی لپیٹ میں لے لیا اور تباہی مچاہی اور شدید سرد ہواؤں کے باعث ملک بھر میں 50 سے زائد افراد ہلاک ہوئے۔

امریکی تاریخ کے بدترین برفانی طوفانوں میں سے ایک برفانی طوفان نے سیاحوں کی دلچسپی کا مرکز اور دنیا کی بلند ترین آبشاروں میں سے ایک نیاگرا آبشار کو بھی اپنی لپیٹ میں لے لیا۔

امریکہ میں آنے والے برفانی طوفان کی سرد اور یخ بستہ ہواؤں نے نیاگرا آبشار کے پانی کو بھی منجمد کر دیا۔

واضح رہے کہ نیاگرا آبشار دنیا بھر سے سیاحوں کی بھیڑ میں سب سے زیادہ مقبول سیاحتی مقامات میں سے ایک ہے، یہ آبشار کینیڈا میں اونٹاریو اور امریکہ میں نیویارک کے درمیان سرحد پر قائم ہے۔

منجمد نیاگرا آبشار کی تصاویر ایک جادوئی منظر دکھاتی ہیں، جمی ہوئی دھند اور برف کی چادروں نے نیاگرا آبشار کے پانی کو اپنی لپیٹ میں لے لیا ہے۔

مجموعی طور پر نیاگرا آبشار تین آبشاروں کا مجموعہ ہے جس میں سب سے بڑی آبشار ہارس شو ہے۔

نیاگرا آبشار نیویارک اسٹیٹ پارک کے مطابق ہر سیکنڈ میں 3,160 ٹن پانی آبشار کے اوپر سے بہتا ہے اور پانی 32 فٹ فی سیکنڈ کی رفتار سے گرتا ہے۔

سوشل میڈیا صارفین کی جانب سے ایسی ٹوئٹس سامنے آئی ہیں جن میں دعویٰ کیا گیا ہے کہ نیاگرا آبشار کا امریکی حصہ ماضی میں پانچ بار جم چکا ہے جب برف نے دریا کے اوپر پانی کے بہاؤ کو روکا تھا۔

آفیشل ویب سائٹ کے مطابق، نیاگرا آبشار اس وقت بنی جب گلیشیئر پگھلنے سے میٹھے پانی کی بڑی جھیلیں بنیں تھیں۔