چین نے وبائی مرض کورونا کے دوران شہریوں کی نقل و حرکت پر نظر رکھنے والی موبائل ایپ کو غیر فعال کرنے کا فیصلہ کر لیا ہے۔

برطانوی خبر رساں ادارے کی خبر کے مطابق چین نے وبائی مرض کورونا کے دوران شہریوں کی نقل و حرکت پر نظر رکھنے والی موبائل ایپ کو آج سے بند کرنے کا فیصلہ کر لیا ہے۔

چین کی یہ موبائل ایپ گزشتہ تین سال سے کام کر رہی ہے اور شہریوں کی نقل و حرکت کی پل پل کی خبریں چینی حکومت کی دسترس میں تھی۔

برطانوی خبر رساں ادارے کے مطابق یہ تازہ ترین پالیسی ایک تبدیلی ہے جس سے اشارہ ملتا ہے کہ بیجنگ اپنی متنازعہ صفر کوویڈ حکمت عملی کو ترک کر رہا ہے۔

برطانوی خبر رساں ادارے کا کہنا ہے کہ یہ اقدام انتہائی علامتی ہے لیکن لوگوں کی روزمرہ کی زندگیوں پر اس کا بہت زیادہ اثر نہیں پڑے گا کیونکہ مقامی ایپس اب بھی چین کے شہروں میں زیر استعمال ہیں۔

سرکاری مواصلاتی سفری کارڈ ایپ، جو فون سگنلز کا استعمال کرتے ہوئے اس بات کا پتہ لگاتی ہے کہ آیا کسی نے کسی ایسے علاقے کا سفر کیا ہے جسے زیادہ خطرہ سمجھا جاتا ہے، اسے چین کی صفر کوویڈ پالیسی کے مرکزی حصے کے طور پر دیکھا گیا۔

لوگوں کو ایپ میں فون نمبر درج کرنے کی ضرورت تھی تاکہ ایک سبز رنگ کا تیر نما نشان نمودار ہو جاتا تھا جس سے یہ ظاہر ہوتا ہے کہ وہ صوبوں کے درمیان سفر کرنے اور کسی متاثرہ علاقے میں داخل ہوئے یا نہیں۔

اب کوویڈ سے بچاؤ کی پابندیوں کے خاتمے کے ساتھ چین کے صوبوں کے درمیان سفر کو آسان کردیا گیا ہے اور قومی ایپ کو حکام نے متروک سمجھا ہے۔

چین میں بہت سے سوشل میڈیا صارفین نے ایپ کی ریٹائرمنٹ کا خیرمقدم کیا ہے۔

لیکن یہ ان متعدد ٹریکنگ ایپس میں سے ایک ہے جس نے چین میں روزمرہ کی زندگی پر حکمرانی کی ہے۔

بہت سے لوگ اب بھی مقامی سہولیات اور عوامی عمارتوں تک رسائی کے لیے اپنے شہر یا صوبے کے ذریعے چلائے جانے والے سکیننگ سسٹم کا استعمال کر رہے ہیں۔