تین میچوں پر مشتمل ون ڈے سیریز کے پہلے میچ میں بنگلہ دیش نے بھارت کو ایک وکٹ سے شکست دے دی۔

تفصیلات کے مطابق بنگلہ دیش میں جاری تین میچوں کی ون ڈے سیریز کے پہلے میچ میں بھارت کو ایک وکٹ سے شکست کا سامنا کرنا پڑا۔

بنگلہ دیش نے ٹاس جیت کر مہمان ٹیم کو پہلے بیٹنگ کی دعوت دی، بھارتی ٹیم 41.2 اوورز میں 186 رنز ہی بنا سکی۔

روہت شرما 27، سریش ائیر 24 رنز بنا کر آؤٹ ہوئے، کے ایل راہول نے 70 گیندوں پر شاندار 73 رنز کی اننگ کھیل کر ٹیم کو مکمل تباہی سے بچایا، بھارت کے اسٹار ویرات کوہلی صرف 9 رنز بنا سکے۔

بھارت کی بیٹنگ لائن تہس نہس کرنے میں آل راؤنڈر شکیب الحسن کا کردار نمایاں تھا، جنہوں نے 10 اوورز میں 36 رنز دے کر 5 وکٹیں حاصل کیں۔

بنگلہ دیش کے پیسر عبادت حسین دوسرے نمایاں بولر تھے جنہوں نے 8.2 اوورز میں 47 رنز دے کر 4 وکٹیں حاصل کیں۔

ہدف کے تعاقب میں بنگلہ دیش کی بیٹنگ لائن بھی وفا نہ کر سکی، صفر پر نجم الحسن داغ مفارقت دے گئے، 26 کے مجموعی اسکور پر انعام الحق بھی آؤٹ ہو گئے۔

لٹن داس اور شکیب الحسن کی ذمہ دارانہ بیٹنگ سے بنگال ٹائیگرز کی اننگ مستحکم ہوئی، لٹن داس 41 رنز بنا کر آؤٹ ہوئے جبکہ شکیب نے 29 رنز بنائے۔

بنگلہ دیش کی نویں وکٹ 136 کے مجموعی اسکور پر گر گئی تھی اور ایسا محسوس ہو رہا تھا کہ بھارت یہ میچ باآسانی جیت جائے گی، مگر آخری وکٹ کی شراکت میں مہدی حسن اور مستفیض الرحمان کے درمیان 51 رنز کی ناقابل شکست پارٹنر شپ نے میچ کی پانسہ پلٹ دیا۔

بنگلہ دیش نے مہدی حسن کے 38 قیمتی رنز کی بدولت 46 اوورز میں 187 رنز بنا کر میچ   صرف ایک وکٹ سے جیت لیا۔ مہدی حسن کو بہترین کارکردگی پر مین آف دی میچ کا ایوارڈ دیا گیا۔

بھارت کی جانب سے محمد سراج نے 3، کلدیپ سین نے 2 اور واشنگٹن سندر نے 2 وکٹیں حاصل کیں۔