سویڈن میں ترکیہ کے سفارت خانے کے باہر مظاہرے کے دوران قرآن پاک کی بے حرمتی پر مسلم ممالک نے شدید غم و غصے کا اظہار کیا۔

تفصیلات کے مطابق یہ افسوسناک واقعہ اسٹاک ہوم میں پیش آیا جہاں سویڈن کے انتہا پسندوں کے نیٹو میں شمولیت کی مخالفت کرنے پر ترکیہ کے سفارت خانے کے باہر احتجاج کر رہے تھے۔

اس مظاہرے کے دوران سویڈن کے دائیں بازو کے کٹر رہنما راسموس پلودن نے سفارت خانے کے باہر قرآن پاک اور ترکیہ کے قومی پرچم کو نذر آتش کیا تھا۔

واضح رہے کہ سویڈن کی نیٹو میں شمولیت کے معاملے پر ترکیہ اور سویڈن کے تعلقات کشیدہ ہیں۔

مظاہرے میں قرآن پاک کی بے حرمتی پر ترک وزیر خارجہ نے اس ناپاک اقدام کی شدید الفاظ میں مذمت کی اور کہا کہ یہ ہماری مقدس کتاب پر گھناؤنا حملہ ہے، جسے کسی صورت برداشت نہیں کیا جائے گا۔

ترک وزیر خارجہ نے مزید کہا کہ آزادی اظہار کی آڑ میں قرآن پاک کی بے حرمتی ناقابل برداشت ہے یہ ہماری مقدس اقدار کی توہین ہے۔

اسٹاک ہوم میں قرآن پاک کی بے حرمتی پر ترکیہ کے وزیر خارجہ نے اپنا دورہ سویڈن بھی احتجاجاً منسوخ کر دیا ہے۔

سویڈن کے انتہا پسندوں کے اس ناپاک اقدام پر سعودی عرب اور پاکستان سمیت متعدد مسلم ممالک نے شدید مذمت کی ہے، ایران اور عراق نے سویڈن کے سفیر کو دفتر خارجہ طلب کر کے اپنا احتجاج ریکارڈ کرایا۔

اردن اور کویت نے سویڈن کی حکومت سے قرآن پاک کی بے حرمتی کرنے والے کٹر رہنما کے خلاف سخت کاروائی کا مطالبہ کیا گیا ہے۔

قرآن پاک کی بے حرمتی پر مسلم دنیا میں غم و غصے پر سویڈن کے وزیر خارجہ ٹوبیاس بلسٹروم نے اپنے ایک بیان میں کہا کہ اسلامو فوبک اشتعال انتہائی خوفناک ہے۔

وزیر خارجہ ٹوبیاس بلسٹروم نے مزید کہا کہ اظہار رائے کی آزادی کا یہ مطلب نہیں ہے کہ آپ کسی کے مذہبی جذبات کو ٹھیس پہنچائیں، انہوں نے کہا کہ سویڈن کی حکومت اس اقدام کی حمایت نہیں کرتی۔

واضح رہے کہ متنازع رہنما راسموس پلودن اس سے قبل بھی قرآن پاک کو نذرآتش کرنے کی ناپاک حرکتیں کر چکا ہے۔