ایک مقامی میڈیا کی رپورٹ کے مطابق کوئٹہ گلیڈی ایٹرز اور پشاور زلمی کے مابین پی ایس ایل 8 سے قبل کوئٹہ میں ایک نمائشی میچ ہو گا۔

تفصیلات کے مطابق پاکستان کرکٹ بورڈ، پاکستان سپر لیگ (پی ایس ایل) کے آٹھویں ایڈیشن سے قبل کوئٹہ گلیڈی ایٹرز اور پشاور زلمی کے درمیان ایک نمائشی میچ کے انعقاد پر غور کر رہا ہے۔

اطلاعات کے مطابق یہ نمائشی میچ 5 فروری کو کھیلا جائے گا جسے ‘یوم کشمیر’ کے طور پر منایا جاتا ہے۔ نجم سیٹھی کی سربراہی میں پی سی بی کی نئی انتظامی کمیٹی ملک بھر کے شائقین کو شامل کرنا چاہتی ہے۔

پی سی بی کے سربراہ کا عہدہ سنبھالنے کے فوراً بعد نجم سیٹھی نے پی ایس ایل 8 کے لیے کوئٹہ کو پانچویں مقام کے طور پر شامل کرنے کا اعلان کیا ہے۔

فی الحال پی سی بی پروڈکشن اور مارکیٹنگ ٹیموں سے مشاورت کر رہا ہے اور حکام نے کوئٹہ کے اسٹیڈیم کا دورہ بھی کیا۔

کوئٹہ گلیڈی ایٹرز کے حکام نے بھی تصدیق کی کہ زلمی کے خلاف نمائشی کھیل میں بھرپور پاکستانی دستہ حصہ لے گا۔

کوئٹہ گلیڈی ایٹر کے ترجمان کا کہنا تھا کہ ہم پہلی بار اپنے گھر پر میچ کھیلنے کے لیے بہت پرجوش ہیں، انہوں نے کہا کہ یہ پی سی بی کی طرف سے اٹھایا گیا ایک اچھا قدم ہے۔

ترجمان کا مزید کہنا تھا کہ کوئٹہ کے شائقین اور ہم اس میچ کا شدت سے انتظار کر رہے ہیں، ہمیں امید ہے کہ ہمارے تمام پاکستانی کھلاڑی اس مقابلے میں شرکت کریں گے۔

گلیڈی ایٹرز کے ترجمان کا مزید کہنا تھا کہ میزبانی کے دوران ہمیں بہت سے چیلنجز کا سامنا کرنا پڑتا ہے، مجھے امید ہے کہ سب کچھ ٹھیک ہو جائے گا۔