سعودی حکام کے مطابق بندرگاہ سے کروڑوں مالیت کی غیرقانونی ادویات کی اسمگلنگ کی کوشش ناکام بنا دی ہے۔

سعودی عرب کی سرکاری خبر رساں ایجنسی کے مطابق سعودی حکام نے لکڑی کے پینلز کی کھیپ میں چھپائی گئی تقریباً 30 لاکھ غیر قانونی ادویات کو دمام کی بندرگاہ کے ذریعے اسمگل کرنے کی کوشش کو ناکام بنا دیا ہے۔

زکوٰۃ، ٹیکس اور کسٹمز اتھارٹی کا کہنا ہے کہ یہ گولیاں کنگ عبدالعزیز پورٹ پر بیرون ملک سے موصول ہونے والی کھیپ میں پائی گئیں۔

انٹرنیشنل ایڈکشن ریویو جرنل میں شائع ہونے والے اعدادوشمار کے مطابق، سمگل شدہ گولیوں کی تخمینہ اسٹریٹ ویلیو 30 سے 75 ملین ڈالرز تک ہے۔

منشیات کی فروخت سے حاصل ہونے والی رقم کو عام طور پر مزید غیر قانونی منشیات اور دہشت گردی سمیت دیگر منظم جرائم کی فراہمی میں لگایا جاتا ہے۔

سرکاری خبر رساں ادارے نے بتایا کہ کھیپ کے دو وصول کنندگان کو جنرل ڈائریکٹوریٹ آف نارکوٹکس کنٹرول کے تعاون سے کئے گئے ایک سیکورٹی آپریشن میں گرفتار کیا گیا۔

سعودی عرب نے منشیات کی اسمگلنگ کے خلاف کریک ڈاؤن تیز کر دیا ہے۔

قبل ازیں، مملکت نے جدہ اسلامی بندرگاہ سے موصول ہونے والی مویشیوں کے چارے کی کھیپ میں چھپائی گئی 40 لاکھ غیر قانونی ادویات کی اسمگلنگ کی کوشش کو ناکام بنانے کے لیے قطری حکام کے ساتھ رابطہ کیا۔