مبینہ آڈیو لیک کے معاملے پر رہنما تحریکِ انصاف ڈاکٹر یاسمین راشد کا کہنا ہے کہ جنہوں نے آڈیو ریکارڈ کی ہے ان کو شرم کرنی چاہیے۔ 

تحریک انصاف ایک بار پھرحکومت کے نشانے پرآ گئی، سابق وزیراعلٰی پنجاب چوہدری پرویز الہٰی کے بعد رہنما پی ٹی آئی ڈاکٹر یاسمین راشد کی غلام محمود ڈوگرسے گفتگو کی مبینہ آڈیو لیک سامنے آ گئی۔

مبینہ آڈیو لیک کے معاملے پر بول نیوز سے بات کرتے ہوئے ڈاکٹر یاسمین راشد کا کہنا ہے کہ جس نے یہ آڈیولیک کی ہے ان سے کہیں کوئی شرم اور حیا کریں۔ ان لوگوں نے پاکستان میں کوئی چیز چھوڑی نہیں ہے۔

یاسمین راشد نے کہا کہ ہمیں بھی پتا ہےسارے سہولت کاران چیزوں کے پیچھے پڑے ہوئے ہیں، ڈوگر صاحب سے متعلق ایک بات واضح کردوں، غلام محمود ڈوگر کے معاملے میں بہت فکرمند ہوں۔

انھوں نے بتایا کہ جےآئی ٹی انویسٹی گیشن کےانچارج ڈوگر صاحب ہیں۔ میں چاہتی ہوں ڈوگر صاحب جلد بحال ہوں اور ہمارا کیس چلے۔ غلام ڈوگر کو بہ طور سی سی پی اوبحالی کا سپریم کورٹ نے کہا ہے۔ اسی لیے میں غلام محمود ڈوگرسے کال کرکےپوچھا۔

رہنما پی ٹی آئی ڈاکٹر یاسمین نے کہا کہ مجھےڈوگرصاحب پراعتماد تھا، اس میں کیا برائی ہےکیا میں پوچھ نہیں سکتی ؟ عمران خان پرحملے کے بعد سیکیورٹی تحفظات ہیں اس لیے کال کی۔ دوپراسیکیوٹر جب ریکارڈ لینے گئے تو پتا چلا چوری ہوگیا ہے۔

انھوں نے مذید کہا کہ ایک تو جنہوں نے آڈیو ریکارڈ کی ہے ان کو شرم کرنی چاہیے۔ یہ خود ہی چوراور منصف بنتے ہیں۔ ان لوگوں نے تماشہ بنایا ہوا ہے۔