امریکی سینٹرل کمانڈ کے سربراہ جنرل مائیکل کوریلا نے کہا ہے کہ وہ پاکستانی ایٹمی اثاثوں کے حفاظتی نظام سے مطمئن ہیں۔

غیر ملکی میڈیا کی خبروں کے مطابق ہاؤس آرمڈ سروسز کمیٹی کے اجلاس میں امریکی جنرل مائیکل ای کوریلا نے کہا کہ پاکستان کو اس وقت بدترین سیاسی کشیدگی اور معاشی مسائل کے غیر معمولی چیلنج کا سامنا ہے۔

امریکی سینٹرل کمانڈ کے سربراہ جنرل مائیکل ای کوریلا کے مطابق پاکستان دہشت گردی سے نمٹنے کی کوشش کر رہا ہے اور کالعدم جماعت ٹی ٹی پی کے جنگ بندی کے خاتمے کے بعد حملوں میں تیزی آئی ہے۔

جنرل مائیکل ای کوریلا نے پاکستانی ایٹمی پروگرام کے حوالے سے بتایا کہ نہیں ایٹمی پروگرام کے حفاظتی طریقہ کار پر اعتماد ہے۔

پاکستان کے آرمی چیف جنرل عاصم منیر کے حوالے سے امریکی سینٹرل کمانڈ کے سربراہ جنرل مائیکل ای کوریلا کا کہنا تھا کہ ان کے ساتھ بہترین تعلقات ہیں۔

واضح رہے کہ چند روز قبل وزیر خزانہ اسحاق ڈار نے سینیٹ اجلاس میں بتایا تھا کہ قومی مفاد کا تحفظ ضروری ہے اور نیوکلئیر یا میزائل پروگرام پر کوئی سمجھوتا نہیں ہوتا۔

وزیر خزانہ اسحاق ڈار نے مزید کہا تھا کہ کسی کو حق نہیں کہ وہ پاکستان کو بتائے کہ کس رینج کے میزائل یا ایٹمی ہتھیار رکھ سکتا ہے۔