روس نے چینی صدر کا روس سے روانگی کے فوراً بعد یوکرین کے علاقے میں میزائل حملہ کر دیا۔

غیر ملکی خبر رساں ادارے کی خبر کے مطابق روس نے یوکرین پر میزائل اور ڈرون سے حملہ کر دیا ہے، یہ حملہ چین کے صدر شی جن پنگ کی ماسکو سے اپنے ملک روانگی کے تھوڑی دیر بعد ہوا۔

خبر رساں ادارے کی رپورٹ میں کہا گیا کہ روس نے یوکوین کے شہر زیپورف زیا میں دو ملحقہ بلند رہائشی عمارتوں پر میزائل سے حملہ کیا، حملے کے بعد عمارتوں میں آگ لگ گئی۔

یوکرین کے ریسکیو حکام کا کہنا ہے کہ فائر فائٹرز نے عمارتوں میں لگنے والی آگ کو بجھا دیا ہے، اور اس حملے میں 1 شخص ہلاک اور 33 افراد زخمی ہو گئے ہیں۔

یوکرین کے صدر ولادیمیر زیلنسکی نے اپنے ایک ٹوئٹ میں کہا کہ روس نے رہائشی علاقوں پر حملہ کیا ہے جہاں عام لوگ اور بچے رہتے ہیں، ان پر گولیاں چلائی جا رہی ہیں۔

صدر ولادیمیر زیلنسکی نے کہا کہ سیکیورٹی کیمرے کی ویڈیو میں دیکھا جا سکتا ہے کہ ایک عمارت دن کی روشنی میں پھٹ رہی ہے۔

یوکرین کے صدر ولادیمیر زیلنسکی نے کہا کہ دنیا کو روسی دہشت گردی کو تیزی سے شکست دینے اور جانوں کی حفاظت کے لیے زیادہ اتحاد اور عزم کی ضرورت ہے۔