سعودی عرب میں پبلک ٹرانسپورٹ کی بہتر سہولیات دینے کے لیے حافلات الریاض کے پہلے مرحلے میں 340 بسیں چلانے کا اعلان کر دیا ہے۔

غیر ملکی میڈیا کی خبروں کے مطابق سعودی عرب میں ریاض شہر کے شاہی کمیشن نے ریاض میں کنگ عبدالعزیز پبلک ٹرانسپورٹ پروجیکٹ کے ایک حصے کے طور پر سفری سہولت حافلات الریاض کے پہلے مرحلے کے آغاز کا اعلان کردیا ہے۔

اس پہلے مرحلے میں سعودی دارالحکومت ریاض میں 340 بسیں چلیں گی اور یہ شہر کے 633 مقامات پر سٹاپ کریں گی۔

حافلات الریاض نامی اس بس سروس کے پہلے مرحلے پر بسیں 15 شاہراہوں پر چلیں گی اور پروگرام میں مجموعی طور پر 86 شاہراہوں کو شامل کیا جائے گا۔

مملکت کے شاہی کمیشن نے کہا کہ حافلات الریاض پروجیکٹ کے پہلے مرحلے کا آغاز ایک سٹریٹجک پروجیکٹ کے طور پر کیا گیا ہے۔

اس پروجیکٹ کا مقصد شہر کی نقل و حرکت کی ضروریات کو پورا کرنا،  مختلف علاقوں کے باہمی رابطے کو مضبوط بنانا ہے اور دارالحکومت کے رہائشیوں اور زائرین کے معیار زندگی کو بلند کرنا ہے۔

الریاض شاہی کمیشن کے بیان میں کہا گیا ہے کہ اس پروجیکٹ کو بتدریج تکمیل تک پہنچایا جائے گا۔

حافلات الریاض نیٹ ورک کے تحت جن سڑکوں پر بسیں چلائی جائیں گی، ان سڑکوں کی لمبائی 1900 کلومیٹر ہے یہ پروجیکٹ پانچ مراحل میں مکمل کیا جائے گا اور اس میں بسوں کی کل تعداد 800 سے تجاوز کر جائے گی۔

ان بسوں کے اسٹاپس کی تعداد 2900 سے زیادہ اور ٹریکس کی تعداد 86 ہوجائے گی۔

حافلات الریاض سروس کام کی مقامات، تعلیم اور تفریحی سرگرمیوں تک پہنچنے کے لیے بسوں کو ایک ذریعہ کے طور پر استعمال کرتے ہوئے معاشرے کے تمام طبقات کے لیے نقل و حرکت میں سہولت فراہم کرنے میں مدد کرے گی اور پبلک ٹرانسپورٹ کے اس منصوبے سے نجی کار کے استعمال اور ٹریفک کے بہاؤ میں کمی آئے گی.

اس سروس کے لیے ایک الیکٹرانک پورٹل بھی شروع کردیا گیا ہے جس سے مسافروں کو روٹس اور ٹکٹوں کی خریداری کے طریقہ کار کو جاننے میں مدد ملے گی، اس حوالے سے موبائل فون ایپ بھی لانچ کردی گئی ہے۔

حافلات الریاض سروس کی ٹکٹ کی قیمت 4 ریال ہے جو کسی ایک بس کے پہلے لانگ ان کے بعد دو گھنٹے تک کارآمد ہے اور اس ٹکٹ کو دوسری بس میں منتقل کرنا ممکن ہے۔

خیال رہے کہ ریاض میں کنگ عبدالعزیز پبلک ٹرانسپورٹ پروجیکٹ میں ٹرینوں اور بسوں کے ایک مربوط نیٹ ورک کا نفاذ شامل ہے، یہ ریاض شہر میں نقل و حرکت کی موجودہ اور متوقع مستقبل کی ضروریات کو پورا کرنے کے لیے کام کرتا اور ایک جدید اور محفوظ ٹرانسپورٹیشن سروس فراہم کرتا ہے۔