بول نیوز اسلام آباد کے بیورو چیف صدیق جان کی گرفتاری پر سابق وزیر اعظم اور چیئرمین تحریک انصاف عمران خان کا شدید الفاظ میں ردعمل سامنے آگیا ہے۔

تفصیلات کے مطابق عمران خان نے سماجی رابطے کی ویب سائٹ ٹویٹر پر اپنے ایک پیغام میں کہا کہ بول نیوز اسلام آباد کے بیورو چیف صدیق جان کی گرفتاری کی شدید مذمت کرتا ہوں، اب تو جس کے بارے میں تحریک انصاف سے ہمدردی کا احتمال بھی ہوتا ہے اسے پوری ڈھٹائی سے نشانہ بنایا جاتا ہے۔

بول نیوز اسلام آباد کے بیورو چیف صدیق جان کی گرفتاری کی شدید مذمت کرتا ہوں۔اب تو جس کےبارےمیں تحریک انصاف سےہمدردی کا احتمال بھی ہوتاہےاسےپوری ڈھٹائی سے نشانہ بنایاجاتاہے۔عمران ریاض،جمیل فاروقی،صابرشاکر، سمیع ابراہیم،چودھری غلام حسین،معید پیرزادہ،سبھی کو ہدفِ انتقام بنایا گیا pic.twitter.com/Hddv8UwL5L

— Imran Khan (@ImranKhanPTI) March 20, 2023

سابق وزیر اعظم اور چیئرمین تحریک انصاف عمران خان نے مزید کہا کہ عمران ریاض، جمیل فاروقی، صابرشاکر، سمیع ابراہیم، چودھری غلام حسین، معید پیرزادہ، سبھی کو ہدفِ انتقام بنایا گیا جبکہ بول اور اے آر وائے کے مالکان کو بھی نشانہ بنایا گیا اور ارشد شریف کو تو شہید کردیا گیا۔

بول بیورو چیف اسلام آباد صدیق جان اغوا

بول بیورو چیف اسلام آباد صدیق جان کو اسلام آباد میں بول کے دفتر کے باہر سے اغوا کیا گیا ہے۔

تفصیلات کے مطابق بول بیورو چیف اسلام آباد صدیق جان کو اچانک 5 سے 6 افراد نے دبوچ لیا، سادہ کپڑوں میں 25 سے 30 افراد بول کے دفتر کے باہر موجود تھے، صدیق جان کو نامعلوم افراد پولیس کی مدد سے اغواء کر کے لے گئے۔

یاد رہے کہ اسلام آباد ہائی کورٹ صدیق جان کو حفاظتی ضمانت دے چکی ہے۔

دوسری جانب پولیس ذرائع کا کہنا ہے کہ تھانہ رمنا پولیس نے صدیق جان کو گرفتار نہیں کیا، رمنا تھانے سے کوئی بھی ٹیم کسی کو گرفتار کرنے نہیں نکلی۔

پی ایف یو جے کی صدیق جان کی گرفتاری کے خلاف کل احتجاج کی کال

فیڈرل یونین آف جرنلسٹس کے سیکرٹری جنرل رانا عظیم نے کل بول ٹی وی اسلام آباد کے بیرو چیف صدیق جان کی گرفتاری کے خلاف احتجاج کی کال دے دی۔

صدیق جان کی گرفتاری پر سمیع ابراہیم کا ردعمل

بول نیوز کے بیورو چیف اسلام آباد صدیق جان کی گرفتاری پر سینئر اینکر پرسن سمیع ابراہیم نے ردعمل دیتے ہوئے کہا کہ آج مریم نواز کی صدیق جان کے خلاف ٹوئٹ سامنے آئی تھی اور اب صدیق جان کو گرفتار کر لیا گیا، حکومت کو کچھ سمجھ نہیں آرہا کہ وہ کیا کر رہی ہے۔