آئی ایم ایف معاہدے پرپاکستان کی حمایت اور مدد کرنے پروزیراعظم شہبازشریف نے سری لنکن صدر سے اظہارِ تشکرکیا ہے۔ 

تفصیلات کے مطابق وزیراعظم شہبازشریف نے سری لنکن صدررانیل وکرما سنگھے سے ٹیلی فون پر رابطہ کیا اورانھوں نے آئی ایم ایف کے ساتھ معاہدے کے سلسلے میں پاکستان کی حمایت اور مدد کرنے پر سری لنکا کے صدر کا شکریہ ادا کیا۔

وزیراعظم شہبازشریف نے سری لنکا کے صدر سے گفتگوکرتے ہوئے کہا کہ آپ نے پاکستان کے دوست اورخیرخواہ کا کردارادا کیا۔ پاکستان کے عوام کی طرف سے آپ کا شکریہ ادا کرتا ہوں۔

وزیراعظم شہبازشریف نے کہا کہ پاکستان اور سری لنکا قریبی بااعتماد دوست ہیں، علاقائی ترقی اور امن کے لئے سری لنکا کے کردار کو خراج تحسین پیش کرتے ہیں۔ امید ہے کہ پاکستان اور سری لنکا موجودہ معاشی مشکلات کے بھنور سے جلد نکل آئیں گے۔

سری لنکا کے صدر نے وزیراعظم کی طرف سے نیک تمناؤں کے اظہار پر شکریہ ادا کیا اور جوابی خیر سگالی کے جذبات کا اظہار کرتے ہوئے کہا کہ پاکستان ہمارا قریبی دوست ہے، دوستوں کی مدد کرنا ہی دوستی ہے۔

سری لنکن صدررانیل وکرما سنگھے نے وزیراعظم شہباز شریف کی مشکل حالات میں کاوشوں کو سراہا اورآئی ایم ایف معاہدہ طے پانے پر وزیراعظم کو مبارک باد پیش کی۔

واضح رہے کہ وزیراعظم شہباز شریف کی ایم ڈی آئی ایم ایف کرسٹلینا جورجیوا سے ملاقات کے موقع پر سری لنکا کے صدرنے زور دیا تھا کہ آئی ایم ایف پاکستان کی مدد کرے۔

سری لنکا کے صدرنے ایم ڈی آئی ایم ایف سے کہا تھا کہ ڈیفالٹ کی وجہ سے سری لنکا کو شدید مصائب کا شکار ہونا پڑا، پاکستان کو اس صورتحال سے بچایا جائے۔