لاہورہائی کورٹ نے سابق وزیراعلٰی پنجاب چوہدری پرویزالٰہی کی اپنی نظر بندی کے احکامات کے خلاف درخواست واپس لینے کی بنیاد پر نمٹا دی۔

تفصیلات کے مطابق لاہورہائی کورٹ کے جسٹس علی باقر نجفی نے پرویز الہی کی نظری بندی کے احکامات کے خلاف دائر درخواست پر سماعت کی۔

چوہدری پرویز الٰہی کے وکیل وکیل عامر سعید راں نے عدالت کو بتایا کہ پرویز الہی کی تمام مقدمات میں ضمانت ہوگئی ہے، ہائیکورٹ نے سابق وزیر اعلی کو کسی بھی غیر ظاہر شدہ مقدمے اور انکوائری میں گرفتار کرنے سے روکا ہے،عدالتی احکامات پر عمل کرنے کے بجائے ڈپٹی کمشنر نے پرویز الہی کی نظر بندی کے احکامات جاری کیے ہیں جو عدالتی احکامات پر اثر انداز ہونے کے مترادف ہے۔

وکیل نے استدعا کی کہ عدالت ڈپٹی کمشنر کے احکامات کو غیر قانونی ہونے کی بنیاد پر کالعدم قرار دے۔

سرکاری وکیل نے بتایا کہ قانون کے مطابق نظر بندی کم از کم پندرہ روز کے لیے کی جا سکتی ہے۔

عدالت نے استفسار کیا کہ ان کی درخواست پر کتنے روز میں فیصلہ ہو جائے گا جس پر سرکاری وکیل نے بتایا کہ کہ ایک ہفتہ میں درخواست پر فیصلہ کر دیا جائے گا، جس پر پرویز الٰہی کے وکیل نے استدعا کی کہ وہ نئی پٹیشن دائر کرنا چاہتے ہیں لہذا ان کی دائر درخواست واپس کردی جائے، جس پرعدالت نے درخواست واپس لینے کی بنیاد پر نمٹا دی۔