محکمہ اطلاعات سندھ میں کرپشن ریفرنس میں ملزم کو پیش نہ کرنے پر عدالت نے برہمی کا اظہارِکیا۔

تفصیلات کے مطابق کراچی کی احتساب عدالت میں محکمہ اطلاعات میں کرپشن ریفرنس کی سماعت ہوئی۔

صوبائی وزیرشرجیل انعام میمن و دیگر ملزمان عدالت میں پیش ہوئے۔ عدالت نے آئندہ سماعت پرتفتیشی افسر کو حاضری یقینی بنانے کا حکم دیتے ہوئےریفرنس کی سماعت 4 اگست تک ملتوی کردی۔

وزیراطلاعات سندھ شرجیل انعام میمن کے خلاف آمدن سے زائد اثاثے بنانے کے ریفرنس میں ملزم سیف اللہ لوہار کی عدم پیشی کے باعث ملزمان پر فرد جرم عائد نہ ہوسکی۔

عدالت نے کہا کہ آپ لوگ یہی چاہتے ہیں کہ کیس 8، 10 سال مزید چلتا رہے۔

جج نے وکلا سے مکالمہ کرتے ہوئے کہا کہ ہمیں سپریم کورٹ نے ڈائریکشن دی ہوئی ہے کہ 6 مہینے میں ٹرائل مکمل کریں، ملزمان پیش نہیں ہورہے تو کیس آگے کیسے چلائیں؟ میں بیمار تھی، کووڈ تھا تب بھی میں عدالت آتی تھی۔

عدالت نے شریک ملزم کے پیش نہ ہونے پراظہار برہمی کیا اورحکم دیا کہ ہم بس کیس چلانا چاہتے ہیں، آئندہ سماعت پر ملزمان ہر صورت میں پیش ہوں۔

وکیل ملزم نے بتایا کہ ملزم سے رابطہ نہیں ہورہا، اس کی طبیعت ٹھیک نہیں جس وجہ سے پیش نہیں ہوسکتے جس پرعدالت نے کہا کہ یہ تو بلکل غیر سنجیدہ رویہ ہے، یہ تو عدالتی احکامات کی خلاف ورزی ہے، فوری طور پر ملزم کو پیش کریں۔

عدالت نے کہا کہ کورٹ کے ساتھ طریقے سے چلیں، عدالت کو مجبورنہ کریں کہ  وارنٹ گرفتاری جاری کیے جائیں۔ آپ لوگ صرف تاریخ پر تاریخ چاہتے ہیں چاہتے جو نہیں ہوگا۔