جنوبی کوریا میں ممکنہ خطرناک سمندری طوفان کے پیش نظر ہزاروں غیر ملکی اسکاؤٹس کا انخلاء شروع کر دیا ہے۔

برطانوی خبر رساں ادارے کی خبر کے مطابق سمندری طوفان کے باعث جنوبی کوریا میں اسکاؤٹ کیمپنگ کے لیے کیمپ سائٹ پر جمع ہونے والے ہزاروں غیر ملکی اسکاؤٹس کو نکالا جا رہا ہے۔

برطانیہ سمیت متعدد ممالک کے اسکاؤٹس پہلے ہی کیمپ چھوڑ چکے ہیں اور انہوں نے کیمپ میں اعلی درجہ حرارت اور صفائی ستھرائی کے خراب حالات کی شکایات بھی کی ہیں۔

یوکے سکاؤٹس کے چیف ایگزیکٹیو میٹ ہائیڈ نے کہا کہ وہ منتظمین کی جانب سے مایوسی محسوس کرتے ہیں اور برطانیہ کی سرگرمیاں برسوں پیچھے رہ گئی ہیں۔

چیف ایگزیکٹیو میٹ ہائیڈ  نے برطانوی خبر رساں ادارے کو بتایا کہ یہ سائٹ صحت کے لیے خطرہ بن چکی ہے۔

واضح رہے کہ ورلڈ اسکاؤٹ جمبوری میں 40 ہزار سے زائد نوجوان اسکاؤٹ شرکت کر رہے تھے۔

35 ڈگری سینٹی گریڈ (95 فارن ہائیٹ) گرمی میں سیکڑوں اسکاؤٹس بیمار پڑ گئے تھے اور گرمی کی تھکاوٹ سے متاثر ہونے والوں میں برطانیہ سے تعلق رکھنے والے اسکاؤٹس بھی شامل تھے۔

4500 افراد پر مشتمل برطانوی گروپ، جس میں سب سے زیادہ لوگ موجود تھے، گزشتہ ہفتے بوان شہر کے قریب سیمانگیم کے کیمپ سائٹ پر پہنچے تھے لیکن ہفتے کے روز انہیں دارالحکومت سیئول کے ہوٹلوں میں منتقل کر دیا گیا۔

چیف ایگزیکٹیو میٹ ہائیڈ نے کہا کہ اس منتقلی سے یوکے اسکاؤٹ ایسوسی ایشن کو اپنے ذخائر میں سے 10 لاکھ پاؤنڈ سے زیادہ لاگت آئے گی۔

چیف ایگزیکٹیو میٹ ہائیڈ نے مزید کہا کہ ہم نے ان ذخائر سے وعدے کیے تھے جس کا مطلب یہ ہوگا کہ اب ہم وہ کام نہیں کر سکتے جو ہم اگلے تین سے پانچ سالوں میں کرنا چاہتے تھے۔

امریکہ اور سنگاپور نے بھی پہلے ہی کیمپ سائٹ سے اپنی ٹیموں کو واپس بلا لیا ہے۔

ورلڈ اسکاؤٹ جمبوری کے منتظمین نے پیر کے روز کہا کہ جنوبی کوریا کی حکومت نے انہیں بتایا ہے کہ اب اس ایونٹ کا انعقاد محفوظ نہیں ہے۔

حکومت کا کہنا ہے کہ اس نے ورلڈ آرگنائزیشن فار اسکاؤٹ موومنٹس اور قومی وفود کے خدشات سنے ہیں، جو کئی دنوں سے سائٹ کو بند کرنے کی درخواست کر رہے تھے۔

جنوبی کوریا کے نائب وزیر برائے ڈیزاسٹر اینڈ سیفٹی مینجمنٹ کم سنگ ہو نے کہا ہے کہ سیمانگیم میں تقریبا 36 ہزار افراد کو بسوں کے ذریعے ان علاقوں میں لے جایا جائے گا جو طوفان کے راستے میں نہیں ہیں۔

انہوں نے مزید کہا کہ یہ ایونٹ اب بھی جاری ہے لیکن “قدرتی آفت کی وجہ سے مقام تبدیل ہو رہا ہے۔

حکام سیئول اور اس کے آس پاس متبادل مقامات اور رہائش کی تلاش کر رہے ہیں۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/latest/2023/08/550604/amp/ کو لائک کریں

ٹوئٹر پر ہمیں فولو کریں https://www.bolnews.com/urdu/latest/2023/08/550604/amp/ اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں