بھارتی ریاست پنجاب میں ایک ہی دن میں کھیتوں میں آگ لگنے کے واقعات میں 740 فیصد اضافہ ہوا، ناسا نے سیٹیلائٹ تصاویر جاری کر دی۔

 بھارتی میڈیا کے مطابق پنجاب میں اتوار کے روز کھیتوں میں آگ لگنے کے 1068 واقعات میں 740 فیصد اضافہ دیکھا گیا جو موجودہ کٹائی کے موسم میں ایک دن میں سب سے زیادہ ہے۔

رپورٹس کے مطابق ہفتہ کے روز فصلوں کی باقیات (پرالی) جلانے کے صرف 127 واقعات پیش آئے۔

اعداد و شمار سے پتہ چلتا ہے کہ اکتوبر میں نسبتا کم دھوئیں کے بعد پنجاب میں پرالی جلانے کے واقعات میں اچانک اضافہ ریکارڈ کیا گیا ہے۔

ناسا کے ورلڈ ویو سیٹلائٹ نے 25 سے 29 اکتوبر کے درمیان پنجاب میں پرالی جلانے کے واقعات کی تصاویر شیئر کی ہیں جس میں کھیت کی آگ کو سرخ نقطوں سے دکھایا گیا ہے

26 اکتوبر کی تصویر میں 25 اکتوبر کے مقابلے میں سرخ نقطے کے کلسٹرمیں اضافہ دکھایا گیا ہے۔ 27 اکتوبر کو آگ لگنے کے واقعات میں نمایاں اضافے کے بعد، اگلے دن ہفتہ کو تیزی سے کمی دیکھی گئی۔

لیکن اگلے ہی دن یعنی کل اتوار کو ریاست کے بڑے حصوں میں کھیتوں میں آگ لگی دیکھی گئی۔

انتظامیہ نے سیٹلائٹ امیج الرٹ کے بعد اب کھیت کی آگ بجھانے کے لئے اپنی فائر بریگیڈ کی ٹیم روانہ کردی ہے۔ حکام کا کہنا ہے کہ جہاں فائر بریگیڈ نہیں پہنچ پاتی، وہاں دیگر ذرائع سے آگ بجھا دی جاتی ہے۔

قابل ذکر ہے کہ اس سیزن میں بڑھتے ہوئے رجحان کے باوجود گزشتہ سال کے مقابلے میں 15 ستمبر سے 29 اکتوبر کے درمیان کھیتوں میں آگ لگنے کے واقعات میں 57 فیصد کمی آئی ہے۔

15 ستمبر سے 29 اکتوبر تک بھارتی ریاست میں کھیتوں میں آگ لگنے کے کل 5254 واقعات ہوئے جبکہ پچھلے سال اسی مدت میں اس طرح کے 12112 واقعات پیش آئے تھے۔

مرکز کے کمیشن فار ایئر کوالٹی مینجمنٹ (سی اے کیو ایم) نے کہا کہ توقع ہے کہ آنے والے ہفتوں میں فصل کی کٹائی کی سرگرمیاں عروج پر ہوں گی۔

اکتوبر اور نومبر میں نئی دہلی میں فضائی آلودگی کی سطح میں خطرناک حد تک اضافے کی ایک وجہ پنجاب اور ہریانہ میں دھان کے بھوسے جلانا سمجھا جاتا ہے۔

چونکہ دھان کی کٹائی کے بعد ربیع کی فصل گیہوں کاشت کی جاتی ہے اس لیے کچھ کسان اگلی فصل کی بوائی کے لیے فصل کی باقیات کو جلدی صاف کرنے کے لیے اپنے کھیتوں میں آگ لگا دیتے ہیں۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں