یمن کے حوثی باغیوں کے سربراہ نے کہا ہے کہ ان کی ملیشیا بحیرہ احمر میں اسرائیلی بحری جہازوں پر حملے کرے گی۔

عرب میڈیا کے مطابق یمن کے حوثی باغیوں کے سربراہ نے کہا ہے کہ ان کی ملیشیا اسرائیل پر مزید حملے کرے گی اور وہ بحیرہ احمر اور آبنائے باب المندب میں اسرائیلی بحری جہازوں کو نشانہ بنا سکتی ہے۔

ایران سے وابستہ گروپ نے رواں ماہ اسرائیل کے خلاف متعدد میزائل اور ڈرون حملے کیے ہیں جس سے اسرائیل اور فلسطینی عسکریت پسند گروپ حماس کے درمیان جنگ کے وسیع تر مشرق وسطیٰ میں پھیلنے کے خطرے کو اجاگر کیا گیا ہے۔

حوثی باغیوں کے سربراہ عبدالمالک الحوثی نے ایک نشریاتی تقریر میں کہا، ہماری آنکھیں بحیرہ احمر، خاص طور پر باب المندب اور یمن کے علاقائی پانیوں کے قریب کسی بھی اسرائیلی جہاز کی مسلسل نگرانی اور تلاش کے لیے کھلی ہیں۔

7 اکتوبر کو حماس کے جنگجوؤں کے اسرائیل میں حملے میں 1200 افراد کی ہلاکت کے بعد سے واشنگٹن ایران کے حمایت یافتہ گروہوں کی سرگرمیوں کے لیے ہائی الرٹ ہے۔

فلسطینی حکام کے مطابق اسرائیل کی بمباری سے 11 ہزار سے زائد فلسطینی شہید ہو چکے ہیں جن میں ایک بڑی تعداد بچوں اور خواتین کی ہے، جبکہ ہزاروں افراد زخمی ہیں۔

واضح رہے کہ یمن کی جنگ تعطل کا شکار ہے کیونکہ لڑائی بڑی حد تک رک گئی ہے لیکن دونوں فریق اقوام متحدہ کی ثالثی میں ہونے والی جنگ بندی کی تجدید کرنے میں ناکام رہے ہیں جو اکتوبر میں ختم ہوگئی تھی۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں