واشنگٹن: پاکستان میں سرکاری اہلکار کی جانب سے دھاندلی میں ملوث ہونے کے اقرار پر امریکی ترجمان کا ردعمل سامنے آگیا۔

ترجمان امریکی محکمہ خارجہ میتھیو ملر نے پریس کانفرنس کی جس میں ایک صحافی کی جانب سے ان سے سوال کیا گیا کہ پاکستان میں سرکاری اہلکار نے دھاندلی میں ملوث ہونے کا اقرار کیا ہے، آپ کا کیا موقف ہے؟

جواب میں ترجمان امریکی محکمہ خارجہ کا کہنا تھا کہ ہم نے سرکاری اہلکار کے دھاندلی کے دعوؤں کی رپورٹ دیکھی ہے، مداخلت یا فراڈ کے دعوؤں کی مکمل اور شفاف تحقیقات ہونی چاہیے۔

انہوں نے کہا کہ یہ تحقیقات پاکستان کے اپنے قوانین اور طریقہ کار کے مطابق ہونی چاہیے، نئی حکومت کی تشکیل پاکستان کا اندرونی معاملہ ہے اور ہم پاکستان کے اندرونی معاملات میں نہیں پڑنا چاہتے۔

ترجمان نے یہ بھی کہا کہ ہم مداخلت کے کسی بھی دعوے یا الزام کی مکمل تحقیقات دیکھنا چاہتے ہیں اور دنیا بھر میں انٹرنیٹ کی آزادی دیکھنا چاہتے ہیں۔

میتھیو ملر مزید کہتے ہیں کہ ایسے پلیٹ فارمز کو آزاد ہونا چاہیے، جہاں لوگ ایک دوسرے سے گفتگو کرتے ہیں اور انٹرنیٹ کی سروسز پاکستان سمیت دنیا بھر کے لوگوں کو دستیاب ہونی چاہیے۔