پیپلز پارٹی کے چیئرمین بلاول بھٹو نے کہا ہے کہ کسی آزاد امیدوار کو ووٹ دے کر اپنا ووٹ ضائع نہ کریں۔

پیپلز پارٹی کے چیئرمین بلاول بھٹو زرداری نے کیماڑی میں پیپلز پارٹی کی انتخابی ریلی سے خطاب کرتے ہوئے کہا کہ وعدہ کرتا ہوں کہ الیکشن جیت کر اس شہر کی خدمت کریں گے، کوئی زبان اور کوئی مذہب کی بنیاد پر کراچی کو تقسیم کرنا چاہ رہا ہے، آپ نے موقع دیا تو صوبائی حکومت اور وفاقی حکومت میرے ہاتھ میں ہوگی۔

انہوں نے کہا کہ محنت کر کے اپنے شہر کی خدمت کریں گے، کراچی کا حق کراچی کی نمائندگی سے ہی ملے گا، کراچی کی 20 سیٹیں دلوا دیں تو 5 سال میں کراچی کا نقشہ بدل دیں گے۔

بلاول بھٹو نے یہ بھی کہا کہ باقی پارٹیاں اپنے مطلب کے لئے الیکشن لڑ رہے ہیں جبکہ باقی لوگ نفرت اور تقسیم کی سیاست کر رہے ہیں، کسی آزاد امیدوار کو ووٹ دے کر اپنا ووٹ ضائع نہ کریں۔

  ان کا کہنا تھا کہ ملک بھر میں مقابلہ دو جماعتوں کے درمیان ہے، یہ ہم سب کا کراچی ہے، میری ماں اس دنیا میں نہیں، میں اس شہر کی ویسے ہی خدمت کروں گا جیسے ماں اپنے بیٹے کی خدمت کرتی ہے۔

پیپلز پارٹی کے چیئرمین کا یہ بھی کہنا تھا کہ اس بار اپنے بھائی کو موقع دیں مایوس نہیں کرواں گا، کراچی کی چپے چپے کی خدمت کروں گا، کیماڑی میں رہنے والے بھائیوں سے امید ہے کہ 8 فروری کو نکلیں گے تیر چلے گا۔

انہوں نے کہا کہ جو ہمارا مقابلہ کرنے کی کوشش کر رہے ہیں وہ نفرت اور تقسیم کی سیاست کر رہے ہیں، اس شہر نے جو قربانیاں دی ہیں وہ تاریخ کا حصہ ہیں، آٹھ فروری کو بڑی تعداد میں سب کو نکلنا ہے اور پورے خاندان کو ساتھ لے کر جانا۔

بلاول بھٹو نے یہ بھی کہا کہ وزارتیں لے کر اسلام آباد میں بیٹھ کر کراچی کو بھول جاتے ہیں، اپنے بھائی کو موقع دیں کراچی کے چپے چپے میں کام کرنا چاہتا ہوں اور اگر کوئی اور منتخب ہوگا تو وہ علاقے میں رکاوٹ بنیں گے۔

پیپلز پارٹی کے چیئرمین بلاول بھٹو نے مزید کہا کہ کام اگر لینا ہے تو ایک بار پیپلز پارٹی کا ساتھ دیں، اگر میرے نمائندے ہونگے تو وہ آپ کے مسائل مجھ تک پہنچائیں گے، مجھے امید ہے میرے کیماڑی میں رہنے والے بھائی بہن آٹھ فروری کو تیر پر ٹھپہ لگائیں گے ،8 فروری کو تیروں کی بارش ہوگی۔