ترکیہ کا دوسرا بڑا سیاحتی شہر انطالیہ پانی میں ڈوب گیا ہے۔

غیر ملکی خبر رساں ادارے کے مطابق ترکیہ کا دوسرے بڑے سیاحتی شہر انطالیہ میں نظام زندگی مفلوج ہو کر رہ گیا ہے جب کہ شہر کے مرکز میں شام کے وقت شروع ہونے والی موسلادھار بارش نے رات بھر شدت اختیار کرلی۔

شدید بارش کے باعث سڑکوں اور انڈر پاسز پر پانی جمع ہونے سے آمدورفت درہم برہم ہوگئی، انطالیہ کے چھ اضلاع میں تعلیمی سرگرمیاں بھی ایک دن کے لیے روک دی گئیں ہیں جب کہ رہائش گاہوں اور گاڑیوں میں پھنسے افراد کو نکالنے کی کوششیں جاری ہیں۔

ملک کے سیاحتی دارالحکومت کے کیپیز ضلع میں غازی بلیوارڈ پر سب وے کے سیلابی انڈر پاس میں پھنسی ہوئی کار میں ایک شخص کی بے جان لاش بھی ملی ہے۔

موسم کی خراب صورت حال کے برقرار رہنے کا امکان ہے اور شہریوں کو حفاظتی اقدامات کے لیے خبردار کیا گیا ہے جب کہ فوری طور پر متعدد اقدامات بھی اٹھائے گئے ہیں۔

انطالیہ میٹروپولیٹن میونسپلٹی فائر ڈپارٹمنٹ کی معلومات کے مطابق گھروں، کام کی جگہوں اور گاڑیوں میں پھنسے بہت سے لوگوں کو نکال لیا گیا ہے۔

انتظامیہ کا کہنا ہے کہ عمارتوں میں گراونڈ فلور اپارٹمنٹس میں تین سے چار فٹ پانی داخل ہوا ہے جس میں رہنے والوں کا سارا سامان پانی میں موجود ہے جب کہ شہر بھر میں ریسکیو آپریشن جاری ہے اور شہر سے پانی کے نکاس میں ابھی مزید وقت درکار ہے.