چیف آف آرمی اسٹاف جنرل سید عاصم منیر کے خصوصی احکامات پر آئی جی ایف سی نے شہید ایس پی اعجاز خان کے گھر پہنچ گئے۔

 پاک فوج کے شعبہ تعلقات عامہ کے مطابق چیف آف آرمی اسٹاف کی خصوصی ہدایات پر میجر جنرل نور ولی خان ،انسپکٹر جنرل فرنٹیئر کور خیبر پختونخوا  نارتھ،  کاٹلنگ میں شہید ہونے والے ایس پی اعجاز خان کے گھر گئے اور اہل خانہ سے ملاقات کی۔

آئی جی ایف سی نے شہید کی مغفرت کے لئے فاتحہ خوانی کی، آئی جی ایف سی نے شہید کے اہل خانہ کے بلند حوصلے کو سراہا۔

آئی جی ایف سی میجر جنرل نور ولی خان نے کہا کہ شہید ایس پی اعجاز خان ایک دلیر اورمحب وطن پولیس افسر تھے، شہید ایس پی دہشتگردوں کے خلاف بڑے متحرک رہے اور وطن عزیز سے دہشتگردی کے ناسور کو ختم کرنے کے لئے اپنی جان قربان کی۔

انہون نے کہا کہ پاک فوج  شہید ایس پی اعجاز خان  کی بچیوں کو مفت تعلیم فراہم کرے گی، آئی جی ایف سی نے پاک فوج  کی جانب سے شہید ایس پی اعجاز خان کے اہل خانہ کو 50 لاکھ روپے کا چیک بھی پیش کیا گیا۔

آئی ایس پی آر کے مطابق آئی جی ایف سی نے ریجنل پولیس آفس مردان کا دورہ کیا۔

آئی جی ایف سی نے ریجنل پولیس آفس مردان میں 27 فروری 2024 کو مردان کے علاقے کاٹلنگ میں دہشتگردوں کے ساتھ آپریشن میں حصہ لینے والے پولیس افسروں اور جوانوں سے ملاقات کی۔

آئی جی ایف سی نے پولیس کے افسروں اور جوانوں کو خراج تحسین کیا اور کہا کہ خیبرپختونخواہ کی پولیس گذشتہ کئ سال سے پاک فوج کے شانہ بشانہ دہشتگردی کے خاتمہ کے لئے سرگرم عمل ہے۔ اور ان کے افسروں اور جوانوں کی قربانیوں کی بدولت خیبرپختونخواہ میں امن قائم ہوا۔

 انسپکٹر جنرل فرنٹیئر کور خیبر پختونخوا  نارتھ میجر جنرل نور ولی خان نے مزید کہا کہ ہشتگردوں کے ناپاک عزائم خیبرپختونخواہ پولیس کے حوصلوں کو متزلزل نہیں کر سکتے۔