وزیرِ اعظم محمد شہباز شریف اور وزیر اعلیٰ پنجاب مریم نواز نے شمالی وزیرِ ستان میں دہشت گردوں کی بزدلانہ کارروائی کی شدید الفاظ میں مذمت کردی۔

وزیرِ اعظم محمد شہباز شریف نے شمالی وزیرستان کے علاقے میر علی میں چیک پوسٹ پر دہشت گردوں کے حملے کی شدید مذمت کرتے ہوئے سیکیورٹی فورسز کے 5 جوانوں کی شہادت پر گہرے دکھ اور غم کا اظہار کیا۔

وزیرِ اعظم نے شہداء کی مغفرت اور ان کے لواحقین کے لئے صبر جمیل کی دعا کی جب کہ انہوں نے کہا کہ سیکیورٹی فورسز کے جوانوں نے دہشت گردوں کے ناپاک عزائم کو مٹی میں ملا دیا۔ مجھ سمیت پوری قوم کو اپنی جانوں کا نذرانہ پیش کرنے والے شہید جوانوں پر فخر ہے۔

دوسری جانب وزیر اعلیٰ پنجاب مریم نواز شریف نے بھی شمالی وزیرستان کے علاقے میر علی میں چیک پوسٹ پر دہشت گردوں کے حملے کی شدید مذمت کی۔

وزیراعلیٰ مریم نواز شریف نے شہید ہونے والے پاک فوج کے افسران اور جوانوں کو خراج عقیدت پیش کیا اور شہداء کے اہل خانہ سے اظہار ہمدردی و تعزیت کی۔

وزیراعلی مریم نواز شریف نے 6 دہشت گردوں کو جہنم رسید کرنے والے لیفٹیننٹ کرنل کاشف کی بہادری اور جرات پر انہیں سلام پیش کیا۔

مریم نواز کہتی ہیں کہ پاک فوج کے لیفٹیننٹ کرنل کاشف نے 6 دہشت گردوں کو انجام تک پہنچایا اور امر ہوگئے، پاک فوج کے افسران اور جوانوں نے دھرتی کی خاطر جان دے کر تاریخ رقم کی۔

وزیر اعلیٰ پنجاب کہتی ہیں کہ پاک فوج کے افسر اور جوان پوری قوم کا فخر ہیں، ہمارے بہادر جوانوں نے دہشت گردوں کی دراندازی کو ناکام بناکر پاک سرزمین کی حفاظت کی۔ افسروں اور جوانوں کی قربانیاں دہشت گردی کے خلاف ہمارے عزم کو مزید مضبوط کرتی ہیں۔