پاکستان سپر لیگ سیزن 9 میں ملتان سلطانز نے پشاور زلمی کو 7 وکٹوں سے شکست دے کر فائنل میں جگہ بنالی۔

تفصیلات کے مطابق کراچی کے نیشنل اسٹیڈیم میں ہونے والے کوالیفائر میچ میں ملتان سلطانز نے پشاور زلمی کو 7 وکٹوں سے شکست دے کر پی ایس ایل کے 9 ویں ایڈیشن کے فائنل میں جگہ بنا لی۔

ملتان سلطانز نے پشاور زلمی کا 146 رنز کا ہدف 3 وکٹوں کے نقصان پر 9 گیندیں قبل حاصل کیا۔

ملتان سلطانز کے اوپنر یاسر خان نے 54 رنز کی عمدہ اننگ کھیلی، کپتان محمد رضوان نے 15 رنز بنائے۔

جانسن چارلس نے 11 رنز بنائے، جبکہ عثمان خان 36 رنز اور افتخار احمد 22 رنز پر ناٹ آؤٹ رہے۔

پشاور زلمی کی جانب سے مہران ممتاز، عامر جمال اور سلمان ارشاد نے 1،1 وکٹ حاصل کی۔

اس سے قبل پشاور زلمی نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 7 وکٹوں کے نقصان پر 146 رنز بنائے۔

پشاور زلمی کے اوپنر صائم ایوب صرف ایک رن کے مہمان ثابت ہوئے، کپتان بابر اعظم نے 46 رنز کی ذمہ دارانہ اننگ کھیلی۔

محمد حارث 22 رنز بنا سکے، ٹام کوہلر کیڈمور 24 رنز بنا کر آؤٹ ہوئے، جبکہ رؤمن پاول نے 12 رنز بنائے اور پال والٹر 14 رنز بنا کر ناٹ آؤٹ رہے۔

ملتان سلطانز کے کرس جارڈن اور اسامہ میر نے 2،2 کھلاڑیوں کو آؤٹ کیا۔ جبکہ ڈیوڈ ویلی، محمد علی اور عباس آفریدی نے 1،1 کھلاڑی کو آؤٹ کیا۔