جماعت اسلامی کے اگلے امیر کے لیے انتخاب کا عمل جاری ہے جب کہ ملک بھر سے 46 ہزار اراکین اپنا خفیہ بیلٹ کاسٹ کریں گے۔

ترجمان جماعت اسلامی قیصر شریف کے مطابق امیر جماعت اسلامی پاکستان کے لیے انتخاب کا عمل جاری ہے، امیر جماعت اسلامی کا ہر پانچ سال بعد انتخاب دستوی تقاضا ہے جب کہ امیر جماعت اسلامی کا انتخاب آئندہ پانچ سال کے لیے ہو رہا ہے۔

قیصر شریف نے کہا کہ نومنتخب امیر جماعت اسلامی کی مدت اپریل 2029 تک ہوگی، جماعت اسلامی ایک مکمل جمہوری جماعت ہے۔ دستور کے مطابق جماعت اسلامی میں ہر سطح پر باقاعدگی سے انتخابات ہوتے ہیں، جماعت اسلامی کسی فرد یا خاندان کی نہیں بلکہ ہر رکن اور کارکن کی ہے۔

ترجمان جماعت اسلامی کا کہنا تھا کہ ملک بھر کے تمام ضلعی دفاتر میں بیلٹ باکس موجود ہیں اور ضلع کی سطح پر مرکزی انتخابی کمیشن کے نمائندے موجود ہیں۔ ملک بھر سے 46 ہزار اراکین اپنا خفیہ بیلٹ کاسٹ کریں گے۔

انہوں نے بتایا کہ اضلاع اور صوبوں سے بیلٹ کے بند لفافے پہنچنے کی آخری تاریخ 31 مارچ ہے جب کہ یکم اپریل سے مرکزی دفتر انتخابی کمیشن منصورہ میں گنتی کا عمل شروع ہوگا۔

قیصر شریف نے کہا کہ گنتی مکمل ہونے پر صدر انتخابی کمیشن راشد نسیم نتائج کا اعلان کریں گے جب کہ مرکزی مجلس شوریٰ نے اراکین کی رہنمائی کے لیے تین نام تجویز کیے ہیں جن میں سراج الحق، لیاقت بلوچ  اور حافظ نعیم الرحمان شامل ہیں۔

ان کا کہنا تھا کہ اراکین جماعت ان تین کے علاوہ بھی کسی کو ووٹ کاسٹ کرسکتے ہیں جب کہ امیر جماعت اسلامی سراج الحق اپنی دوسری دفعہ مدت امارات 8 اپریل کو پوری کررہے ہیں۔

ترجمان جماعت اسلامی نے مزید کہا کہ سراج الحق جماعت اسلامی کے پانچویں امیر ہیں جب کہ مولانا سید ابو اعلیٰ مودودی ، میاں طفیل محمد ، قاضی حسین احمد اور سید منور حسن بھی جماعت کے امیر رہے ہیں۔