گلیمورگن کرکٹ کلب نے سیزن 2024 کے لیے پاکستانی فاسٹ بولر میر حمزہ سے معاہدہ کرلیا۔

پاکستان کے 31 سالہ فاسٹ بولر میر حمزہ پانچ ٹیسٹ میچز میں قومی ٹیم کی نمائندگی کرچکے ہیں جب کہ وہ رواں پی ایس ایل سیزن 9 میں بھی کراچی کنگز کی نمائندگی کررہے ہیں۔

میر حمزہ کو ہیمپشائر میں جانے والے مائیکل نیسر کی جگہ گلیمورگن کرکٹ کلب میں شامل کیا گیا ہے۔

اس موقع پر میر حمزہ کا کہنا تھا ’’میں اس موسم گرما میں کاؤنٹی چیمپئن شپ کے لیے گلیمورگن میں شامل ہونے پر بہت خوش ہوں‘‘۔

انہوں نے کہا ’’میں دوبارہ گرانٹ بریڈ برن کے ساتھ کام کرنے کے لیے بھی پرجوش ہوں جو اس سے قبل قومی ٹیم کے ساتھ بھی کام کرچکے ہیں‘‘۔

واضح رہے کہ میر حمزہ فرسٹ کلاس کرکٹ میں 22 کی اوسط کے ساتھ 434 وکٹیں حاصل کرچکے ہیں۔