اسلام آباد: ملک کے زیادہ تر علاقوں میں اگلے 48 گھنٹوں میں معتدل سے شدید بارشوں، بعض مقامات پر آندھی اور پہاڑی علاقوں میں برفباری کا امکان۔

ایم ڈی ایم اے نے اگلے 12 سے 24 گھنٹوں میں شمالی علاقوں سمیت خیبرپختونخوا، گلگت بلتستان، آزاد جموں و کشمیر، بالائی اور وسطی پنجاب میں معتدل سے شدید بارش، برفباری اور بیشتر علاقوں میں پر آندھی اور ژالہ باری کا امکان ظاہر کردیا۔

ایم ڈی ایم اے کے مطابق اگلی بارشوں کا سلسلہ 5 مارچ سے 7 مارچ تک کے درمیان متوقع ہے، بارشوں کا سلسلہ بلوچستان کے ساتھ خیبر پختونخوا، کشمیر، گلگت بلتستان اور پنجاب کے بالائی علاقوں کو متاثر کرسکتا ہے۔

ایم ڈی ایم اے کا کہنا ہے کہ پنجاب کے جنوبی علاقوں میں بھی کچھ علاقوں میں بارش کا امکان ہے، بارشوں کا نیا نظام سندھ کے شمال مغربی علاقوں میں بارش کے امکانات کو بڑھاسکتا ہے۔

این ڈی ایم اے نے تمام متعلقہ اداروں کو ایڈوائزری بھی جاری کردی ہے، این ڈی ایم اے نے ہنگامی صورتحال سے نمٹنے کیلئے عملے اور سامان کی پیشگی فراہمی یقینی بنانے کی ہدایت کردی ہے۔

ان کا کہنا ہے کہ این ڈی ایم اے تمام متعلقہ اداروں کے ساتھ رابطے میں ہے اور صورتحال کا جائزہ لیا جا رہا ہے، مسافروں اور سیاحوں سے گزارش ہے کہ وہ سیلابی اور لینڈ سلائیڈنگ والے علاقوں میں جانے سے پرہیز کریں۔

این ڈی ایم اے نے مزید کہا کہ اربن فلڈنگ کے اندیشے کے پیش نظر ضروری اقدامات کیے جائیں جب کہ عوام موسم کی صورتحال سے باخبر رہیں۔