اسلام آباد: چیف جسٹس آف پاکستان قاضی فائز عیسیٰ نے ہائی کورٹ ججز خط کا نوٹس لے لیا۔

چیف جسٹس آف پاکستان قاضی فائز عیسیٰ نے ہائی کورٹ ججز خط کا نوٹس لیتے ہوئے سات رکنی لارجر بینچ بھی تشکیل دے دیا ہے۔

چیف جسٹس قاضی فائز عیسیٰ سات رکنی بینچ کے سربراہ ہوں گے جب کہ جسٹس منصور علی شاہ، یحییٰ خان آفریدی اور جمال خان مندوخیل بینچ میں شامل ہیں۔

علاوہ ازیں جسٹس اطہر من اللہ، جسٹس مسرت ہلالی اور جسٹس نعیم اختر افغان کو بھی بینچ میں شامل کیا گیا ہے۔ سات رکنی لارجر بینچ بدھ کو ساڑھے گیارہ بجے سماعت کرے گا۔

خیال رہے کہ اسلام آباد ہائی کورٹ کے 6 ججز کے عدالتی امور میں مداخلت کے الزام  کے معاملے پر ملک  بھر کے 300 سے زائد وکلا نے گذشتہ روز سپریم کورٹ کو از خود نوٹس لینے کے لیے خط لکھا تھا۔

خط لکھنے والوں میں سابق چیف جسٹس پاکستان تصدق جیلانی کے بیٹے ثاقب جیلانی، سلمان اکرم راجہ، عبد المعیز جعفری ، ایمان مزاری، زینب جنجوعہ سمیت دیگر وکلا شامل تھے۔

خط میں کہا گیا تھا کہ ہائی کورٹ کے 6 ججوں کے ساتھ اظہاریکجہتی اور ان کے جرأت مندانہ اقدام کو سراہتے ہیں، ہائی کورٹ ججوں کے خط کے معاملے پر  مناسب کارروائی کا مطالبہ کرتے ہیں۔

خط میں مزید کہا گیا تھا کہ یہ عوامی مفاد اور بنیادی حقوق کے نفاذ کا معاملہ ہے، سپریم کورٹ آئین کے آرٹیکل 184(3) کے تحت اس معاملے کا نوٹس لے اور سپریم کورٹ تمام دستیاب ججوں پر مشتمل بینچ تشکیل دے کر سماعت کرے۔