اسلام آباد: رواں مالی کے 9 ماہ میں ترسیلات زر، برآمدات اور مالی ذخائر میں اضافہ رپورٹ کیا گیا ہے۔

وزارت خزانہ نے ماہانہ معاشی آؤٹ لک رپورٹ جاری کردی ہے جس کے مطابق رواں مالی کے 9 ماہ میں ترسیلات زر، برآمدات اور مالی ذخائر میں اضافہ ہوا جب کہ ایف بی آر محصولات، نان ٹیکس آمدنی اور مالی خسارے میں اضافہ ہوا۔

رپورٹ کے مطابق زرعی قرضوں، اسٹاک ایکسچینج انڈیکس سمیت پالیسی ریٹ میں اضافہ ہوا، درآمدات، کرنٹ اکاؤنٹ خسارے، غیر ملکی سرمایہ کاری اور ترقیاتی اخراجات میں کمی ریکارڈ کی گئی۔

رواں مالی سال کے 9 ماہ میں ترسیلات زر 21 ارب ڈالر کی رہیں، گزشتہ مالی سال اسی عرصے میں ترسیلات 20.8 ارب ڈالر کی تھیں۔

رپورٹ میں بتایا گیا ہے کہرواں مالی سال کے 9 ماہ میں برآمدات میں 9.3 فیصد کا اضافہ ہوا جب کہ 23 ارب ڈالر کی برآمدات ہوئیں، گزشتہ مالی سال 21.1 ارب ڈالر کی برآمدات تھیں۔

وزرات خزانہ کا کہنا ہے کہ رواں مالی سال کے 9 ماہ میں درآمدات میں 8 فیصد کی کمی ہوئی اور جولائی تا مارچ 38.8 ارب ڈالر کی درآمدات ہوئیں جب کہ گزشتہ مالی سال اسی عرصے میں 42.1 ارب ڈالر کی درآمدات تھیں۔