انٹرنیشنل کرکٹ کونسل (آئی سی سی) کے اعلی سطح کے سیکیورٹی وفد  کی سینٹرل پولیس آفس  لاہور آمد ہوئی۔

تفصیلات کے مطابق آئی سی سی کے سیفٹی اینڈ سیکیورٹی مینجر ڈیوڈ مسکر کی قیادت میں آئے وفد میں  کئی سینئر افسران شامل تھے جن میں  آئی سی سی سے کرنل اعظم خان، پی سی بی سے کرنل خالد محمود اور عثمان واہلہ شامل تھے۔

ایڈیشنل آئی جی آپریشنز پنجاب شہزادہ سلطان اور اے آئی جی آپریشنز زاہد نواز مروت سمیت  کئی سینئر افسران موقع پر موجود تھے ۔

وفد کو پنجاب میں منعقد ہونے والے بین الاقوامی کرکٹ میچز کے سیکیورٹی انتظامات  کے بارے  میں آگاہ کیا گیا۔

آئی سی سی کے سیفٹی اینڈ سیکیورٹی مینجر ڈیوڈ مسکر نے کہا کہ  پنجاب پولیس نے پاکستان میں انٹرنیشنل کرکٹ ایونٹس کی بحالی میں بہترین کردار ادا کیا ہے۔

ڈیوڈ مسکر نے کہا کہ لاہور سمیت صوبہ بھر میں انٹرنیشنل کرکٹ ایونٹس کے لیے پنجاب پولیس کے فول پروف سیکیورٹی اقدامات کو سراہتے ہیں۔

آئی جی پنجاب پولیس ڈاکٹر عثمان   انور نے سیفٹی اینڈ سیکیورٹی افسران کو سینٹرل پولیس آفس کے ڈیش بورڈ پر سیکیورٹی صورتحال و اقدامات  کے بارے  میں آگاہ کیا۔

آئی جی پنجاب نے کہا کہ   غیر ملکی کھلاڑیوں، میچ آفیشلز اور شائقین کرکٹ کو بھرپور سیکیورٹی فراہم کر رہے ہیں۔  کرکٹ ٹیموں کے تحفظ  کے لیے ایئرپورٹس، ہوٹلز، اسٹیڈیمز اور روٹس سمیت تمام مقامات پر سیکیورٹی ہائی الرٹ رکھی جاتی ہے۔

ڈاکٹر عثمان   انور نے کہا کہ    تمام میچز  کے لیے قبل از وقت انتظامات، ٹیم روٹس،ا سٹیڈیم کی حفاظت سمیت تمام ممکنہ پہلوؤں کو مدنظر رکھتے ہیں۔

ان کا مزید کہنا تھا کہ   ایگزیکٹو پولیس، ٹریفک پولیس، ایلیٹ، ڈولفن، پیرو، اینٹی رائٹ سمیت تمام یونٹس کے اہلکار سیکیورٹی ڈیوٹی پر مامور کیے جاتے ہیں۔

آئی جی پنجاب نے آئی سی سی وفد کے سیکیورٹی سربراہ کو پنجاب پولیس کی طرف سے سووینئر بھی پیش کیا۔