سکھ شہری پر  امریکہ میں قاتلانہ حملےکی سازش کرنے پر بھارت سے جواب طلب کرلیا گیا۔

امریکی  نائب وزیر خارجہ کرٹ کیمبل نے آن لائن بریفنگ میں کہا کہ  امریکی سرزمین پر ایک امریکی شہری کے قتل کی کوشش کی گئی۔  اس سازش میں بھارت کے ملوث ہونے کی تحقیقات  کی جارہی ہیں۔

کرٹ کیمبل کہنا تھا کہ سکھ شہری کو قتل کرنے کی سازش پر بھارت سے بات کی ہے جس پر بھارت نے امریکی تحفظات کا جواب دیا ہے۔ معاملہ براہ راست بھارتی حکومت  کے ساتھ اعلیٰ ترین سطح پراٹھایا ہے۔

 انہوں نے مزید کہا کہ بھارت پر واضح کیا ہے کہ امریکہ اس معاملے پر جواب چاہتا ہے۔ بھارت سے کہا ہے کہ ہماری سرزمین پر سکھ شہری کےقتل کی کوشش کے معاملے پر ہونے والی پیشرفت سے بھی آگاہ کیا جائے۔

کرٹ کیمبل نے کہا کہ بھارتی حکام قتل کی سازش کے الزامات کے بعد ادارہ جاتی اصلاحات کرنے پر بھی غور کررہے ہیں۔