وزیراعظم شہبازشریف کے حکم پر اضافی گندم درآمد میں ملوث معطل افسران کے خلاف انکوائری شروع کر دی گئی ہے۔

سیکریٹری فوڈ نے وزیراعظم کی طرف سے معطل افسران کو چارج شیٹ کر دیا گیا ہے، اضافی گندم درآمد میں ملوث سابق فوڈ سیکیورٹی کمشنر ڈاکٹر وسیم الحسن کو چارج شیٹ کر دیا گیا ہے۔

چارج شیٹ میں وسیم الحسن پر نااہلی، مس کنڈکٹ اور کرپٹ طرزعمل کے الزامات شامل ہیں، چارج شیٹ میں وسیم الحسن کو گندم بحران کا مرتکب قرار دیا گیا ہے۔

سابق فوڈ سیکیورٹی کمشنر ڈاکٹر وسیم الحسن کو 14 روز میں اپنے دفاع میں تحریری جواب جمع کرانے کی ہدایت کی گئی ہے، معطل افسران کو تحریری جواب انکوائری افسر صالح فاروقی کو جمع کرانے کی ہدایت کی گئی ہے۔

ذرائع کے مطابق وزیراعظم شہباز شریف نے اضافی گندم درآمد میں ملوث 4 معطل افسران کے خلاف تحقیقات کی منظوری دی تھی اور سیکریٹری تجارت صالح احمد فاروقی کو انکوائری افسر مقرر کیا تھا۔

ذرائع کا کہنا ہے کہ چاروں معطل افسران کے خلاف سول سرونٹس ایفی شنسی اینڈ ڈسپلن رولز 2020 کے تحت انکوائری ہو رہی ہے۔

ذرائع کا کہنا ہے کہ وزارت نیشنل فوڈ سیکیورٹی کے 4 افسران کو اضافی گندم درآمد کرنے کا ذمہ دار قرار دے کر معطل کیا گیا۔

معطل افسران میں ڈی جی پلانٹ پروٹیکشن اللہ دتہ اور فوڈ سیکیورٹی کمشنر ڈاکٹر وسیم کے علاوہ ویٹ کمشنر اور ڈائریکٹر ڈی پی پی سہیل شہزاد بھی شامل تھے۔

ذرائع کا مزید کہنا ہے کہ ان افسران کو ناقص منصوبہ بندی اور غفلت برتنے کا ذمہ دارقرار دیا گیا ہے۔