اسلام آباد: صدر مملکت آصف علی زرداری کا کہنا ہے کہ پاکستان میں ٹیکنالوجی ہائی ویز بنانے کی ضرورت ہے۔

صدر مملکت آصف علی زرداری سے قائداعظم یونیورسٹی اسلام آباد کے وائس چانسلر پروفیسر ڈاکٹر نیاز احمد اختر نے ملاقات کی۔

ملاقات میں صدر مملکت نے کہا کہ ٹیکنالوجی ہائی ویز بنانے کے لئے طلباء کی انفارمیشن ٹیکنالوجی کے بنیادی ڈھانچے تک رسائی بڑھانا ہوگی، ملکی تعلیمی پروگرام مضبوط بنانے، طلباء کو جدید مہارتوں سے آراستہ کرنے کی ضرورت ہے۔

صدر زرداری کہتے ہیں کہ طلباء کو لیپ ٹاپ فراہم کرنے سے ان کی تعلیم تک رسائی بڑھے گی اور ڈیجیٹل تقسیم ختم ہوگی، نوجوانوں کو ٹیکنالوجی میں مہارتوں سے آراستہ کیا جائے تاکہ وہ قومی اور بین الاقوامی منڈیوں میں مقابلہ کرسکیں۔

آصف علی زرداری کا کہنا تھا کہ اللہ تعالیٰ نے پاکستان کو کثیر انسانی وسائل سے نوازا ہے، انسانی وسائل کو جدید ترین تعلیم اور ہنر فراہم کرکے ایک طاقت بنانے کی ضرورت ہے۔ پاکستان تعلیم یافتہ اور ہنرمند انسانی وسائل برآمد کرکے زرمبادلہ کما سکتا ہے۔

صدر مملکت نے کہا کہ جامعات ہنر مند پیشہ ور افراد پیدا کرنے میں اہم کردار ادا کرتی ہیں، پاکستان کو ڈاکٹرز ، انجینئرز، نرسوں اور اساتذہ جیسے مزید پیشہ ور افراد پیدا کرنے پر توجہ دینا ہوگی جب کہ جامعات طلباء کی کردار سازی اور تعلیمی معیار مزید بہتر بنانے پر توجہ دیں۔

ان کا مزید کہنا تھا کہ طلباء کی حوصلہ افزائی کیلئے قائد اعظم یونیورسٹی کے پوزیشن ہولڈرز کو نقد صدارتی ایوارڈز دیے جائیں۔

قائد اعظم یونیورسٹی کے وائس چانسلر نے صدر مملکت کو یونیورسٹی کے تعلیمی پروگراموں اور دیگر انتظامی امور کے بارے میں آگاہ کیا۔

وائس چانسلر نے کہا کہ قائد اعظم یونیورسٹی پاکستان کی ٹاپ رینکنگ یونیورسٹیوں میں سے ایک ہے، عالمی درجہ بندی میں 315 ویں نمبر پر ہے۔

وائس چانسلر مزید کہتے ہیں کہ قائد اعظم یونیورسٹی معاشرے کیلئے سود مند تحقیق پر توجہ دے رہی ہے، ڈیجیٹلائزیشن قائد اعظم یونیورسٹی کی اولین ترجیح ہے۔

صدر مملکت نے پاکستان کے تعلیمی شعبے میں یونیورسٹی کے کردار کو سراہا جب کہ صدر مملکت نے وائس چانسلر کو یونیورسٹی کے مالی مسائل کو مناسب فورم کے ذریعے حل کرانے میں اپنے تعاون کا یقین دلایا۔