اسلام آباد: صدر مملکت آصف علی زرداری کا کہنا ہے کہ گلگت بلتستان میں سرمایہ کاری سے معاشی خوشحالی آئے گی۔

صدر مملکت آصف علی زرداری سے گلگت بلتستان کونسل کے اراکین نے ملاقات کی جب کہ ملاقات میں صدر مملکت نے گلگت بلتستان کی سماجی و اقتصادی ترقی پر توجہ دینے کی ضرورت پر زور دیا۔

وفد نے صدر مملکت کو گلگت بلتستان کی ترقیاتی اور مالی ضروریات بارے آگاہ کیا جب کہ اجلاس میں وفاقی وزیر برائے امور کشمیر و گلگت بلتستان انجینئر امیر مقام نے بھی شرکت کی۔

علاوہ ازیں وزیر اعلیٰ گلگت بلتستان گلبر خان، گلگت بلتستان کونسل کے اراکین اور اعلیٰ سرکاری افسران نے بھی شرکت کی۔

آصف علی زرداری نے کہا کہ گلگت بلتستان میں سرمایہ کاری سے معاشی خوشحالی آئے گی، گلگت بلتستان کے عوام کو دہلیز پر بنیادی سہولیات کی فراہمی کے لئے صحت، تعلیم اور سڑکوں کے انفراسٹرکچر کی ترقی کیلئے اقدامات کیے جائیں گے۔

صدر مملکت نے گلگت میں ہوائی اڈے کو وسعت دینے، گلگت بلتستان کی ترقی کے لئے نئے راستے تلاش کرنے کی ضرورت پر زور دیا۔

صدر مملکت کا کہنا تھا کہ گلگت بلتستان چین کے سنگم پر واقع ہے جس میں بے پناہ وسیع اقتصادی صلاحیت موجود ہے، گلگت بلتستان کی اقتصادی صلاحیت سے عوامی مفاد میں استفادہ کیا جانا چاہیے۔

انہوں نے مزید کہا کہ دیامر بھاشا ڈیم کے متاثرین کو معاوضہ دینے کا معاملہ مناسب فورم پر اٹھایا جائے گا۔

وفد نے صدر مملکت کو بتایا کہ صحت سہولت پروگرام کے بند ہونے سے گلگت بلتستان کے لوگ ہیلتھ انشورنس کی خدمات حاصل کرنے سے قاصر ہیں۔

صدر مملکت نے گلگت بلتستان کی عوام کو علاج معالجے کی سہولیات کی فراہمی کے لئے صحت سہولت پروگرام کو بے نظیر انکم سپورٹ پروگرام میں شامل کرنے کی تجویز دی۔

وفد نے گلگت بلتستان کی ترقی اور مسائل کے حل میں دلچسپی لینے پر صدر مملکت کا شکریہ ادا کیا جب کہ صدر مملکت نے وفد کو گلگت بلتستان کے مسائل کے حل کے لئے اپنے تعاون اور حمایت کا یقین دلایا۔