کراچی: شہر قائد کی سڑکوں اور گرین بیلٹ پر تجاوزات پر وزیراعلیٰ سندھ کا برہمی کا اظہار۔

وزیراعلیٰ سندھ سید مراد علی شاہ کی زیرِ صدارت کراچی کے مسائل پر اجلاس ہوا جس میں صوبائی وزراء ناصر حسین شاہ، سعید غنی، میئر کراچی مرتضیٰ وہاب، وزیراعلیٰ کے پرنسپل سیکرٹری آغا واصف، چیئرمین پی اینڈ ڈی نجم شاہ، کمشنر کراچی حسن نقوی اور سیکریٹری خزانہ فیاض جتوئی نے شرکت کی۔

علاوہ ازیں سیکرٹری بلدیات خالد حیدر شاہ، سیکرٹری ٹرانسپورٹ، ایم ڈی سندھ سالڈ ویسٹ مینجمنٹ بورڈ امتیاز شاہ، ڈی جی سندھ بلڈنگ کنٹرول اتھارٹی رشید سولنگی، ایڈیشنل آئی جی کراچی عمران یعقوب، ایم ڈی واٹر بورڈ صلاح الدین اور تمام ڈپٹی کمشنرز نے بھی اجلاس میں شرکت کی۔

اجلاس کے آغاز میں وزیراعلیٰ سندھ نے کراچی شہر کی سڑکوں اور گرین بیلٹ پر تجاوزات پر برہمی کا اظہار کیا۔

وزیراعلیٰ سندھ نے کہا کہ کونسے اختیارات کے تحت کوئی بھی ان تجاوزات کی اجازت دیتا ہے؟ اگر شہر میں تجاوزات جاری رہے تو میں ان علاقوں کے تمام افسران کے خلاف کارروائی کروں گا۔

انہوں نے کہا کہ سندھ حکومت کراچی کو صاف ستھرا اور خوبصورت شہر بنانے میں بلدیاتی اداروں کے ساتھ مصروف ہے جب کہ دوسری طرف کچھ لوگ شہر میں تجاوزات کرنے میں مصروف ہیں۔

وزیراعلیٰ سندھ کا کہنا تھا کہ کوئی بھی فٹ پاتھ، گرین بیلٹ اور سروس روڈ پر تجاوزات کی اجازت نہیں دے سکتا، کچھ نجی دفاتر نے فٹ پاتھ پر اپنے جنریٹر رکھے ہوئے ہیں۔ تمام تجاوزات کے خاتمے کے لئے بلدیاتی اداروں، پولیس اور شہری انتظامیہ کو ہدایت کردی ہیں۔

وزیراعلیٰ سندھ نے میئر اور کمشنر کراچی کو تمام تجاوزات ہٹانے کی ہدایات دیتے ہوئے کہا کہ ڈی سی اور پولیس ان تجاوزات کو ہٹانے میں بھرپور مدد کریں گے جب کہ وزیراعلیٰ نے حیدرآباد، سکھر، میرپورخاص اور دیگر ڈویژنل ہیڈکوارٹرز سے تجاوزات ہٹانے کی بھی ہدایت کردی ہیں۔

سید مراد علی شاہ نے تمام پارکنگ پلازا کو فعال کرنے کی ہدایت دیں اور مزید کہا کہ غیر قانونی یا سڑکوں پر پارکنگ کی اجازت ہرگز نہیں دی جائے گی۔

اجلاس میں انہیں بتایا گیا کہ سڑکوں پر ملبہ چھوڑ دیا جاتا ہے جب کہ اجلاس میں فیصلہ کیا گیا کہ سرکاری و غیر سرکاری عمارت تعمیر کرنے والے سڑکوں پر ملبہ نہیں ڈالیں گے۔ وزیراعلیٰ سندھ نے کہا کہ سندھ بلڈنگ کنٹرول اتھارٹی ایسے بلڈرز کے خلاف کارروائی کرے۔